Eth Conselh Generau d’Aran patrocine era Copa d’Euròpa d’esquí aupin que se hè en Baqueira Beret

Aguesta competicion de caractèr internacionau, que compde damb eth patrocini deth govèrn aranés, se hè entre aué e deman ena estacion d’esquí aranesa, amasse es milhors esquiadors d’eslalòm masculin en renauït estàdium Fernández Ochoa, en airau de Beret, e consolide era Val d’Aran coma referent en mon der esquí de competicion

Eth conselhèr d’Espòrts deth Conselh Generau d’Aran, Javier Cavero, a declarat: “damb eth patrocini d’aguest nau eveniment refortim eth nòste compromís damb era promocion der espòrt en totes es sues dimensions: der espòrt de base, era tecnificacion e eth naut rendiment”. E higie: “Aguesti eveniments non sonque dan visibilitat internacionau ath nòste territòri, tanben impulsen era practica esportiva entre es nòsti joeni”.

Tanben en contèxte esportiu, dimars auérem eth privilègi d’acuélher ua jornada especiau damb es esportistes dera Reiau Federacion Espanhòla d’Espòrts d’Iuèrn (RFEDI) e es joeni deth CETEI, qu’amassèc es esportistes deth programa de tecnificacion que desvolopam amassa damb era Federacion Catalana d’Espòrts d’Iuèrn (FCEH) e eth Conselh Català de l’Esport, e tanben es esportistes de tecnificacion en categoria infantila. En aguesta trobada, es nòsti esquiadors e esquiadores aueren era oportunitat de compartir experiéncies damb es sòns idòls, tà fomentar es valors der espòrt e era convivéncia intergeneracionau.

En declaracions deth Departament d’Espòrts deth govèrn aranés: “Vos convidam a toti a assistir tara Copa d’Euròpa e a gaudir d’aguest espectacle esportiu que, sense dobte, serà ua hèsta entà toti es aimants der esquí e ua oportunitat unica entà promocionar era nòsta estimada Val d’Aran”.