• Laguens deth programa d’activitats organizades peth Dia Internacionau dera Hemna (8M), eth Conselh Generau d’Aran, a trauès deth sòn airau d’Espòrts, vos convide a participar ena taula rodona “Hemnes qu’inspiren: conquerint er espòrt e era vida”.

Aguesta trobada aurà lòc deman dimèrcles 12 de març, tàs 19h, ena sedença deth govèrn aranés e compdarà damb era participacion des esportistes d’elèit Lydia Iglesias e Marta Céster, dues hemnes araneses qu’an destacat enes sues disciplines e devengut  referentes entàs generacions futures.

Tèmes a debàter

Era igualtat en espòrt: Quines dificultats an trobat es hemnes entà arribar ath naut nivèu? Quines oportunitats s’an dubèrt enes darrèri ans?

Esport d’elèit e vida personau: Coma conjugar era exigéncia dera nauta competicion damb era vida personau e professionau?

Era importància der espòrt ena vida: Coma pòden espòrts coma er esquí o era bicicleta inspirar a mès persones a hèr activitat fisica?

Espòrt e territòri: Eth ròtle dera Val d’Aran coma espaci privilegiat entath desvolopament dera activitat esportiva e era promocion de talents locaus.

Era inspiracion e eth cambi generacionau: Coma es referents pòden ajudar a motivar a futures esportistes e a toti es que vòlen integrar er espòrt en sòn dia a dia.

Aguesta activitat, impulsada per Airau d’Espòrts deth Conselh Generau d’Aran, vò meter en valor eth ròtle transformador der espòrt en benestar fisic, emocionau e sociau. Ei un espaci de reflexion e debat entà totes es persones que s’interèssen pera activitat fisica e era igualtat d’oportunitats en espòrt e ena vida.

Era taula redona ei dubèrta a toti es publics e vos animam a compartir era experiéncia, e debàter e apréner damb es protagonistes.

Vielha, 11 de març 2025