Eth Conselh Generau d’Aran a trauès de Torisme Val d’Aran, a liurat per tresau an consecutiu patrocinis per valor de 12.000 € as esportistes d’elèit aranesi.

Tòn Cónsul, Patinador; Aymar Navarro,freerider; Ruben Casseny, ciclista e esquiaire de hons; Álex Puente, esquiaire olimpic, an estat es esportistes arreconeishudi d’aguestes ajudes.

Eth Vice-sindic e conselhèr d’espòrts e Joenessa deth C.G.A., Luís Carlos Medina, acompanhat de May Peus, president dera Reau Federacion Espanhòla d’Espòrts d’Iuèrn, an estat es encargadi de liurar un an mès e per tresau an consecutiu es patrocinis entara ajuda des activitats esportiues as joeni esportistes d’elèit dera Val d’Aran, damb era fin de potenciar Aran coma destinacion esportiua des Pirenèus en tot eth territòri espanhòu e a nivèu internacionau e, hèr dera Val d’Aran un punt de destinacion d’esportistes d’elèit.

Luís Carlos Medina, a demanat as esportistes patrocinadi a animar e dar exemple as mès joeni entà que seguisquen es sòns passi e d’aguesta manèra arténher que mès joeni aranesi poguen acabar en tot convertir-se en esportistes de naut nivèu, donques que didec: “encara qu’es recorsi economics tostemp son limitadi, des deth Conselh Generau d’Aran tostemp èm dauridi a ajudar as esportistes aranesi enes sues carrères cap ara capitada”.

Eth conselhèr a arrebrembat qu’entà eth Govèrn deth C.G.A., ei un orgulh e ua sòrt poder ajudar ad aguesti joeni esportistes aranesi damb 3.000 € cadun e poder hèr tot eth seguiment. Medina tanben a volut arregraïr er esfòrç que per era sua part hèn es familhes des esportistes. Eth conselhèr d’Espòrts e Joenessa, a hèt mencion tanben des accions qu’amie a tèrme eth Conselh Generau d’Aran en çò que tanh ara desestacionalizacion dera activitat esportiua en Aran, atau coma a volut destacar eth hèt qu’eth pròplèu 10 de junhsèga de 2016, era Val d’Aran acuelherà ua gessuda d’etapa deth Tour de França, e abans era Marcha Beret aurà estat pròva puntuable deth Campionat d’Euròpa d’Esquí Nordic.

En tot arrespóner as qüestions des mieis de comunicacion, Tòn Cónsul, Aymar Navarro, Ruben Casseny e Álex Puente, an mostrat eth sòn arregraïment ath Conselh Generau d’Aran e a Torisme Val d’Aran, e an explicat as assistents quini son es rèptes qu’afronten en aguesta naua sason e quines son es mètes que s’an mercat en cadua des sues especialitats.

Tanben er aranés May Peus, president dera Reau Federacion Espanhòla d’Espòrts d’Iuèrn, a avalorat positivaments qu’eth Conselh Generau d’Aran hèsque er esfòrç de potenciar es espòrts que se practiquen ena Val d’Aran, a trauès des joeni esportistes aranesi, donques que didec, “invertir en espòrt, ei invertir en educacion e salut”, en tot destacar que “es quate an ua grana responsabilitat coma ambaishadors dera mèrca Val d’Aran en tot eth mon” e en tot aufrir tot eth supòrt dera federacion entà contunhar en tot impulsar er espòrt e es esportistes aranesi.