Acaben es òbres de reabilitacion dera glèisa de Sant Joan d’Arres

S’a restaurat eth campanau, era cubèrta e es faciades deth monument dera Val d’Aran.

Er Institut Catalan deth Solèr, INCASÒL, a finalizat era dusau fasa dera consolidacion estructurau deth torn e era cubèrta dera glèisa de Sant Joan d’Arres, en Arres (Val d’Aran). Era òbra a compdat damb ua inversion de 64.663,53 € (sense IVA) e a estat executada pera empresa Transportes y Excavaciones Barba, S.L.

Es òbres an consistit en apariament des patologies estructuraus e es umiditats deth campanau, era cubèrta e es faciades. Era glèisa presente contrafòrts enes faciades èst, nòrd e sud. Er espessor des murs de barrament demorauen redusidi ara meitat un còp depassauen era còta deth torn. Ei en aguesta zòna a on a calut refortilhar mès era estructura.

Era glèisa ei d’estil barròc, de finaus deth sègle XVIII, bastida damb sonque ua nau damb torn de canon e ua zòna de presbiteri damb torn de creueria. En extrèm nòrd-oèst dera glèisa se tròbe un campanau adossat ara nau principau, damb accès ar interior d’aguest per ua pòrta des deth dusau còr. Era portalada, plaçada ath mur de meddia, ei laurada damb un dentilhon superior de marbre.

Finançament en dues fases

Era òbra qu’ara culmine ei era dusau fasa dera prevista en convèni, signat eth 9 de deseme de 2013 e modificat per ua addenda de 8 de març de 2013, que per problèmes pressupostaris se subdividic en dues fases. Era prumèra d’eres siguec executada peth Conselh Generau d’Aran er an 2013.

Aguesta dusau fasa a estat finançada per INCASÒL, mejançant es hons provenenti deth Convèni de transferéncies der an 2015 damb era Agéncia der Abitatge de Catalonha, er Avescat d’Urgell, eth Conselh Generau d’Aran e er Ajuntament d’Arres. Era accion hè part deth programa “Revíuer es Vielhes Ciutats” qu’a coma objectiu era recuperacion e reabilitacion de patrimòni istoric.

Vielha, 18 de gèr de 2017

Conselh Generau d’Aran: Núria Sanjuan

Hònt: INCASÒL