Vielha, 7 de deseme de 2016.- Tecnicians d’auviatge deth Conselh Generau d’Aran, amassa damb eth catedratic dera Escòla Tecnica Superiora d’Arquitectura dera Universitat Rovira i Virgili de Tarragona, Josep Lluis Guinovart, constatèren ena visita deth passat dia 5 de deseme de comprobacion d’òbres ara cobèrta dera glèisa dera Purificacion de Bossòst, era existéncia de henedures ena estructura deth campanau dera glèisa de Bossòst.
Aguesta grèu situacion a comportat era convocatònia per part deth sindic d’Aran Carlos Barrera, d’ua reünion urgenta, realizada aué dia 7 de deseme de 2016, damb era preséncia deth director generau d’Auviatge dera Generalitat de Catalunya, Josep Maria Boya; Josep Lluís Guinovart; er archiprèst dera Val d’Aran, Pere Balaguer; eth baile de Bossòst, Amador Marquès e tecnics deth Conselh Generau d’Aran e dera Generalitat de Catalunya.
En aguesta reünion s’a prenut era decision de plaçar ua bastida de refòrç estructurau interior e exterior deth campanau, elaborar un estudi geotecnic der entorn deth campanau e era redaccion d’un projècte tecnic entara articulacion d’ua solucion definitiva ad aguest grèu problèma.
Aguesta accion definitiva, ei de besonh hèr-la pendent eth pròplèu an 2017.
En an 2015 era glèisa dera Purificacion de Bossòst siguec declarada BCIN (Ben Culturau d’Interès Nacionau) pera Generalitat de Catalonya, qu’eth campanau n’ei un element valuosíssim deth romanic dera Val d’Aran. Ei per aguest motiu que, en paraules deth sindic d’Aran, Carlos Barrera, “eth Conselh Generau d’Aran darà era maximala prioritat ad aguesta accion, que se materializarà a trauèrs d’un convèni entre er Bisbat d’Urgell, era Direcció General de Patrimoni dera Generalitat de Catalunya e eth pròpri Conselh Generau d’Aran “.