• Eth Departament de Torisme deth Conselh Generau d’Aran, amassa damb era Agència Catalana del Turisme dera Generalitat de Catalunya, a amiat a tèrme un seguit d’accions de promocion autant damb es mieis de comunicacion, coma damb agéncies de viatges e pes hilats sociaus, entà prebotjar eth torisme en nòste territòri pendent er ostiu

Deth Conselh Generau d’Aran ençà se trabalhe entà reforçar eth messatge qu’era Val d’Aran ei ua destinacion segura deuant era percepcion negatiua que s’a en quauqui païsi ara ora de viatjar a Catalunya e, en conseqüéncia, a Aran.

En aguest sens, eth Departament de Torisme, a amiat a tèrme ua sèria d’accions entà revertir aguesta tendéncia entre es mieis de comunicacion e influencers de França e d’Espanha, que son es nòsti principaus mercats emissors de torisme e enes que cau enfocar-se en aguesti moments.

En çò que tanh ath mercat francés, conjuntament damb era Agència Catalana de Turisme dera Generalitat de Catalunya, aguestes setmanes s’a reforçat er enviament de newsletters as mieis de comunicacion damb idees inspiracionaus d’experiéncies que se pòden realizar en Catalunya e Aran. Gràcies ad aguest trabalh, s’organizen diferents trips damb televisions e influencers. Er objectiu ei mostrar que se pòt viatjar de manèra tranquila e segura pr’amor que se seguissen es protocòls sanitaris establidi. Contunhe tanben ua campanha publicitària entà promocionar Catalunya e era Val d’Aran en mieis de comunicacion deth sud de França, canals digitaus comercializadors e d’autes plataformes.

Per un aute costat, eth Conselh Generau d’Aran e Baqueira Beret an renauit eth sòn convèni de collaboracion entath plaçament d’ua oficina de torisme en Tolosa entà promocionar era Val d’Aran e era estacion d’esquí, un espaci qu’aufrís ath nòste territòri ua grana oportunitat entà fomentar e publicitar es atractius dera Val d’Aran pendent tot er an.

En çò que hè ath mercat espanhòu, amassa damb era Generalitat, i a en marcha diferentes campanhes per segments especifics pr’amor qu’eth visitant dera rèsta der Estat requerís d’ues accions molt pensades e microsegmentades. Atau, se realize ua accion cooperada damb es Destinacions de Turisme Familiar e eth programa Hola Família! a trauès dera quau s’an organizat viatges entà 8 influencers entà conéisher era nòsta aufèrta. Tanben s’amie a tèrme ua campanha entre era premsa especializada entà prebotjar un torisme actiu entà incentivar era visita a espacis pòc conegudi. A trauès de plataformes especifiques de viatges, premsa especializada e campanhes de marqueting se da a conéisher eth Grand Tour de Catalunya, damb era rota Lleida-Pirenèus que trauèsse era Val d’Aran, coma un producte que respon as tendéncies actuaus. Dera madeisha manèra, s’a reforçat er enviament de newsletters e comunicats a mieis especializadi e agéncies de viatges damb prepauses atractives que servisquen entà transméter eth messatge de destinacion segura.

D’un aute costat, eth Conselh Generau d’Aran a desplegat tanben diuèrses campanhes coma Inspira Aran entà méter en valor es nòsti camins, montanhes e pòbles, o era campanha entà dar visibilitat as productes agroalimentaris dera Marca Garantia dera Val d’Aran. Tanben s’an amiat a tèrme vidèos dirigits a segments especifics coma eth ciclisme o es espòrts d’aventura.

Dera madeisha manèra, son dejà en foncionament projèctes coma Mercats d’Aran, que pendent tot er ostiu fomente eth comèrç locau e artesanau enes diferents pòbles dera Val d’Aran, o Cornèrs d’Aran, qu’aufrís as visitants era oportunitat de gaudir de rotes guidades pes lòcs mès emblematics des pòbles aranesi.