Eth Govèrn d’Aran a previst amiar a tèrme pendent 2016 diuèrses accions de consolidacion e adeqüacion en desparières glèises e capèles dera Val d’Aran.

Ei eth cas entre d’auti dera consolidacion des murs dera glèisa de Sant Esteve e eth mur deth cementèri de Montcorbau; era consolidacion, eliminacion d’umiditats e era metuda en valor dera glèisa de Sant Esteve de Betren; es projèctes expositius des relòtges des campanaus de Betren, Casarilh e Les; Era installacion electrica e er esclairatge dera glèisa de Sant Fabian d’Arres; eth montatge expositiu deth retaule gotic dera glèisa de Cap d’Aran en Tredòs e era adeqüacion deth campanau; era consolidacion deth mur de contencion dera glèisa de Sant Joan d’Arres; er apariament dera estructura e tampa dera capèla dera Vèrge des Desamparats de Montcorbau; era adeqüacion dera capèla dera Pietat de Bossòst e era adeqüacion deth conjunt arqueologic deth Casteth Leon.

Totes aguestes accions s’enquadren en objectiu deth Govèrn d’Aran de méter en valor e mantier er auviatge eclesiastic e culturau dera Val d’Aran e ath madeish temps profitar eth potenciau d’aguest auviatge entà explorar naues vies ena aufèrta toristica deth país.

En aguest sens era conselhèra de Torisme e Desvolopament economic deth Conselh Generau d’Aran Anna Díaz, soslinhèc que “part des esfòrci deth Govèrn d’Aran e de Torisme Val d’Aran, anaràn destinadi a enriquir e melhorar era aufèrta toristica dera Val d’Aran que pòt aufrir ath costat deth torisme de nhèu e esquí, natura, gastronomia e païsatge, eth valor der auviatge culturau e eclesiastic que desvelhe fòrça interès en visitants atrèti pera aufèrta de torisme culturau e que non i volem renonciar”.