Vielha, 16 de hereuèr de 2018.- Eth sindic d’Aran, Carlos Barrera e eth president dera Deputacion de Lhèida, Joan Reñé, mantengueren aguesta setmana ua reünion de trabalh ena sedença dera corporacion provinciau, qu’entre d’auti ahèrs, acordèren eth compromís per part dera Deputacion entà sufragar ua naua ambulància avalorada en 150.000 èuros. Se tracte d’un des tres veïculs d’emergéncies qu’eth Conselh Generau d’Aran a de renauir enguan. Pera sua part eth Conselh Generau d’Aran, invertirà 350.000 èuros ena estructura de Pompièrs e Emergències entad aqueriment de dues naues ambulàncies e dus veïculs de servicis ordinaris d’emergéncies, tau coma s’acordèc ena session extraordinària deth Plen deth Conselh Generau d’Aran deth passat 27 de noveme de 2017.

Ena reünion, eth sindic d’Aran, Carlos Barrera, exposèc ath president dera Deputacion de Lhèida, es allegacions qu’eth Conselh Generau presentarà ath projècte deth Ministèri de Foment entà reformar era carretèra N-230 de Sopeira ath tunèl de Vielha, e demanèc a Joan Reñé que convòque ua naua reünion dera plataforma des entitats locaus que demanen melhores en aguesta carretèra.

Era amassada tanben servic a tractar aspèctes restacadi damb era cofinanciacion des diuèrsi programes europèus que compartissen era Deputacion de Lhèida e eth Conselh Generau d’Aran, pr’amor que coma expliquèc eth sindic d’Aran, aguesti projèctes de grana envergadura son fòrça importants entara Val d’Aran.

Fin finau, eth sindic d’Aran e eth president dera deputacion de Lhèida tanben abordèren es aspèctes religadi damb era planificacion des trabalhs dera carretèra d’accès en Vilamòs.