• Eth conselhèr de Territòri d’Aran, Jose Antonio Boya, e eth president dera Communauté de Communes Pyrénées Haut Garonnaises, Alain Castel, an signat ua carta d’intencions.

• En aguesta carta s’a acordat potenciar eth ligam deth transpòrt public entre Saint Gaudens e era Val d’Aran damb un servici que foncionarà a compdar deth pròplèu 18 d’abriu.

• Tanben se meterà en marcha eth Camin de Sant Jaime entre eth caplòc istoric deth Comminges, Sant Bertrand e Roda de Isábena en tot passar pera Val d’Aran e potenciant toristica e economicament es nòsti territòris.

 

 

Aué s’a celebrat er acte de commemoracion deth Tractat de Lies e Patzeries en Fos (França) e ena Val d’Aran ena sedença deth Conselh Generau d’Aran a on s’a signat ua carta d’intencions. Er acte a compdat damb era preséncia, entre d’auti, deth conselhèr de Territòri d’Aran, Jose Antonio Boya, dera conselhèra de Torisme e Desvolopament Economic d’Aran, Anna Díaz, deth president dera Communauté de Communes Pyrénées Haut Garonnaises, Alain Castel, e deth president de la Communauté de Communes deth Canton de Saint Béat, Joël Gros.

 

 

Era expression “lies e patzeries” ei formada per dues paraules occitanes. Era prumèra “Ligas”, signifique acòrd que junh es vals que signen er acòrd e “Patzerias” contén era idèa de patz entre vals. Son acòrds destinadi a reglamentar eth dret de pastura, de transit de ramats, eca e tanben de preservar era patz entre eres.

Eth 22 d’abriu de 1513 se signe aguest tractat en Pla d’Arrem, entre Sant Beat e Aran, damb er impuls dera monarquia francesa e era espanhòla. Eth rei espanhòu que permet aguest tractat ei Ferran II, eth Catolic. Eth rei francés ei Lluís XII, coneishut coma Lluís d’Orleans.

En tractat totes aguestes vals se comprometen a auer patz, a non talhar es relacions comerciaus e a préner mesures comunes en cas de guèrra entre França e Espanha. Aguesta gent fronterèra hè 504 ans interpretèc dejà quina anaue a èster era trajectoria deth bastiment dera naua Euròpa eliminant termières fòrça viatges artificiaus que son en mapa mès non en còr.

 

 

Damb aguest esperit, eth conselhèr de Territòri d’Aran, Jose Antonio Boya, e eth President dera Communauté de Communes Pyrénées Haut Garonnaises, Alain Castel, an signat aué ua carta d’intencions a on an acordat:

– Potenciar eth ligam deth transpòrt public entre Sant Gaudens e era Val d’Aran en tot recrear er esperit der antic tramvai de Marinhac ath Pònt de Rei e eth servici dat pera Alsina Graells de Autotransportes entre es pòbles de Les e Fos en tempsi contemporanèus.

– Méter en marcha eth Camin de Sant Jaime entre eth caplòc istoric deth Comenge, Sant Bertran (antic Lugdunum Convenarun) e Roda de Isábena en tot passar peth Comenge, Val d’Aran, Alta Ribagorça, (catalana) e Ribagorza Oriental, (aragonesa), en tot potenciar toristica e economicament es nòsti
territòris.

Eth pròplèu 18 d’abriu se meterà en foncionament eth servici de transpòrt public de viatgèrs entre era Val d’Aran e Comminges damb er objectiu de facilitar es desplaçaments des usatgèrs deth transpòrt public transfronterèr.

 

ORARIS:   

 

Aguest servici serà de deluns a diuendres, e es oraris seràn es abituaus des linhes actuaus en cas dera Val d’Aran, des de Baqueira enquia Les, damb connexion enquia Saint Gaudens per part dera companhia francesa.

Eth prètz deth bilhet simple serà eth madeish qu’enquiara abonen es usatgèrs deth servici intèrn dera Val d’Aran, qu’ei de 1,10 € peth trajècte entre Baqueira e Les. Eth prètz deth viatge enquia Saint Gaudens (Les- Saint Gaudens) serà de 2,20 €.

 

 

 

 

Vielha, 6 d’abriu de 2017

 

Conselh Generau d’Aran: Núria Sanjuan