• Eth govèrn d’Aran e er Ajuntament de Les an metut a disposicion un servici de transpòrt enquiath castèth en ua celebracion dubèrta ath public damb gessuda des dera Plaça deth Haro.

Es trabalhs, qu’an estat finançats peth Govèrn aranés e er Ajuntament de Les an auut un còst  de tres cents cinquanta mil euros destinadi ara restauracion deth castèth, era fortificacion mès antica d’Aran, datada enes sègles X e XI.

Es òbres an consistit ena consolidacion deth castèth, eth mur medievau, eth recreishement dera tor e s’an ampliat es trebalhs arqueologics des entorns deth complèxe medievau  entà poder-la daurir ath public.

Aguest projècte comencèc damb era encomana per part dera Deputacion de Lleida ena legislatura de 2015/2019 e a compdat damb eth vist e platz deth departament de cultura dera Generalitat de Catalunya.

Entara sindica d’Aran, Maria Vergés: “Era metuda en valor deth patrimòni ei un objectiu primordiau deth govèrn d’Aran, autant a nivèu culturau coma de dinamizacion toristica” e higie “amassa damb eth projècte de reabilitacion de Castèth Leon en Es Bòrdes, auram artenhut un producte patrimoniau de prumèr nivèu”.

Er alcalde de Les, Andreu Cortés, a explicat: “Era finalitat d’aguesta intervencion ei potenciar aguest actiu e eth centre istoric de Les tà refortir aguesti elements coma ua forma de méter en valor era istòria deth pòble e que pogue èster un recors patrimoniau e  de dinamizacion economica”.

Pendent er acte, era sindica d’Aran a anonciat er acòrd artenhut damb er Ajuntament de Les entà signar un convèni peth quau eth castèth entrarà a formar part der hilat de musèus dera Val d’Aran amassa damb eth musèu der Haro e es sòns entorns. Atau madeish, era sindica d’Aran s’a comprometut a amiar tà deuant ua dusau fasa d’intervencion en castèth de Les entara sua musealizacion.

Vielha, 7 de junh 2024