• Aguesta setmana auràn lòc era presentacion dera naua estructura de Pompièrs-Emergéncies e era ponéncia tecnica sus rescat en montanha, e eth dia 4 era jornada compdarà damb diferents actes commemoratius

Eth govèrn deth Conselh Generau d’Aran, en tot dar compliment ath sòn objectiu de méter en valor era institucion e toti es ens qu’en depenen, a premanit un programa d’actes entà celebrar Santa Barbara, patrona des Pompièrs.

Per prumèr viatge, eth govèrn d’Aran inicie damb aguest programa d’activitats, tota ua sèrie d’accions destinades a méter en valor eth caractèr insitucionau tant deth Conselh Generau d’Aran coma des organismes qu’en depenen.

Es activitats previstes començaràn aguesta madeisha setmana damb era presentacion dera naua estructura de de Pompièrs-Emergéncies, a cargue deth Major des Pompièrs, Manel Bosch, deman dimèrcles, 27 de noveme, tàs 19:30 ores. Diuendres, 29 de noveme tàs 20:00 ores ena sala d’actes deth Conselh, aurà lòc era ponéncia tecnica deth cap d’equip deth Grop de Rescat de Montanha (GRM), Juan Miguel Riu.

Eth dia de Santa Barbara, eth 4 de deseme, era jornada començarà, coma tostemp, damb es tòcs de sirèna e eth passavila des veïculs. Dempús dera recepcion d’autoritats e convidats en Parc de Pompièrs de Vielha, se contunharà damb era missa ena glèisa de Santa Maria de Mijaran.

Tot seguit, se procedirà as nomenaments des caps d’equip e des Pompièrs Volontaris, es parlaments oficiaus e era projeccion deth vidèu commemoratiu que met en valor era gran labor deth còs de Pompièrs d’Aran. Entà acabar, aurà lòc er aperitiu aufrit peth Conselh e Pompièrs-Emergéncies.

Ei de besonh rebrembar qu’aguesti actes, que vòlen destacar eth trabalh que realizen a diari es efectius de Pompièrs-Emergéncies, son duberti a totes es persones que volguen participar d’aguest dia tan especiau.