Vielha, 15 de mai de 2018.- Eth Hilat de Musèus des Tèrres de Lhèida e Aran aufrís exposicions, presentacions, charrades, concèrts, tasti de vin, talhèrs, balhs, visites urbanes e monuments, illusionisme, “performances”, projeccions sus façades e activitats infantiles, entre d’auti, damb motiu deth Dia Internacionau des Musèus.

Es onze musèus deth hilat aufriràn aguesta setmana ath public ua cinquantia d’activitats culturaus e ludiques entà celebrar eth Dia Internacionau des Musèus (DIM), qu’a lòc annauments eth 18 de mai damb era fin de méter en valor e apropar aguestes institucions ara societat. Era 41au edicion deth DIM a enguan eth lèma “Museus hiperconnectats: nous enfocaments, nous públics” e vò enfatizar enes connexions qu’es musèus establissen damb era comunitat, eth sòn païsatge culturau o eth sòn entorn naturau.

Damb era Jornada de Pòrtes Dubèrtes (dia 18) e era Net des Musèus (dia 19) coma actes centraus, eth DIM aufrirà as visitants, prepauses de tot tipe, en tot començar pes mès abituaus coma exposicions tematiques, conferéncies, concèrts e musica en dirècte, presentacions de pèces museistiques e de libres, visites guidades (quauques a cargue d’alumnes de Primària e Segondària), itineraris pedagogics urbans e activitats infantiles.

Mès singulares son iniciatiues coma activitats de planetari, un tast de vins d’ánfora, talhèrs de calligrafia medievau, de pentura romanica mural e sus taula o de paleontologia, visites a castèths, projeccions de vidèo sus façada, “performances” d’improvisacion multidisciplinars, balhs de swing, exposicion de pèces en veirines de botigues o sessions de illusionisme. Eth programa complèt se pòt consultar ena web patrimoni.gencat.cat/museusdelleida  .

En transcors dera presentacion deth programa d’activitats, celebrada aguest meddia ena glèisa de Vilac, era presidenta deth Hilat, Carme Bergés, expliquèc qu’es 3 objectius basics dera entitat son connectar aguesti equipaments culturaus damb eth territòri, en dusau lòc “ensenhar er auviatge que custòdiam d’ua manèra desparièra, mès ausada e informau, a fin de captar mès public, basicaments joen” e fin finau potenciar es contactes entre musèus “entà enfortir-mos coma Hilat”.

Er acte a estat presidit peth sindic d’Aran, Carlos Barrera, qui a subervengut ena importància deth supòrt des institucions ena mantenença e ena promocion des musèus, ena linha dera accion que desvolòpe eth Conselh Generau d’Aran.

Era “Pèça Misteriosa”

Ua des novetats dera campanha promocionau deth DIM d’enguan ei eth jòc virtuau “Era Pèça Misteriosa”, ua enigma dirigida as usatgèrs des hilats sociaus des onze musèus que hèn part deth hilat jos eth hashtag #DIMisteri2018. En aguest jòc ludic cada musèu a publicat messatges enes hilats “en tot informar” sus era aparicion enes sues sales d’ua “pèça misteriosa” qu’aparten a d’aute musèu deth hilat. A compdar d’ací, es usatgèrs les calie endonviar de quina pèça se tracte, de quina epòca ei e a quin musèu aparten reauments.

A propòsit d’aguest jòc virtuau cau arrebrembar que justaments eth lèma d’enguan, “Museus hiperconnectats: nous enfocaments, nous públics”, suberven en hèt qu’es naues tecnologies permeten as musèus arribar mès ath delà deth sòn public abituau per miei de quauquarren tan simple coma ei un hashtag, e ath madeish temps presentar es sues colleccions d’ua manèra desparièra e totauments innovadora, en tot atrèir atau audiéncies naues e en tot superar es limitacions d’espaci e de temps.

Acte simbolic ena glèisa de Vilac

Es representants des musèus deth hilat an profitat era presentacion deth programa d’activitats deth DIM entà desvolopar un acte simbolic allusiu ath concèpte que presidís era celebracion d’enguan, era “iperconnexion” entre musèus. En un scenari format per onze colomnes de pèira deth temple de Vilac a on figurauen es simbèus e es nòms des onze centres e qu’èren enlaçadi damb còrdes, es sòns directors an penjat ua fotografia dera “pèça misteriosa” deth sòn musèu.

Es musèus que hèn part deth Hilat de Musèus des Tèrres de Lhèida e Aran son er Ecomusèu des Valls d’Àneu (Esterri d’Àneu), eth Musèu Comarcau de Cervera (Cervera), eth Musèu Comarcau der Urgelh (Tàrrega), eth Musèu d’Isona e era Conca Dellà (Isona), eth Musèu d’Art Jaume Morera (Lhèida), eth Musèu dera Noguera (Balaguer), eth Musèu de Lhèida (Lhèida), eth Musèu dera Val d’Aran (Vielha), eth Musèu Diocesan d’Urgelh (Era Seu d’Urgelh), eth Musèu Diocesan e Comarcau de Solsona (Solsona) e eth Musèu de Guissona (Guissona).

Hònt e Fòtos: Hilat de Musèus des Tèrres de Lhèida e Aran