Vielha, 3 de març de 2017.- Eth Conselh Generau d’Aran a trauès deth SIAH (Servici d’Informacion e Atencion ara Hemna) organize es actes de commemoracion deth Dia Internacionau dera Hemna.

Eth pròplèu dimèrcles 8 de març entas 12 ores, ena plaça deth Conselh Generau d’Aran se liegerà eth manifèst institucionau.
Entà acabar, ena sala de premsa deth Conselh Generau d’Aran (3ª planta) se harà era presentacion dera Lei 17/2015 deth 21 de junhsèga, d’igualtat efectiva de hemnes e òmes, as administracions, organismes publics e entitats privades, que compdarà damb era preséncia dera conselhèra de Salut e Benéster deth Govèrn d’Aran, Anna Díaz. Era presentacion dera Lei ei daurida a totes es enterpreses de la Val d’Aran que i volguen participar.

Extrach deth Preambul dera Lei 17/2015 deth 21 de junhsèga, d’igualtat efectiva de hemnes e òmes:

Eth dret fonamentau dera igualtat d’hemnes e òmes constituís un valor principau entara democracia e ei un besonh essenciau en ua societat democratica modèrna. Aguest dret, non sonque a d’èster arreconeishut legauments, senon que, ath delà, s’a d’exercir d’ua manèra efectiua en tot implicar-ne toti es aspèctes dera vida: politics, economics, sociaus e culturaus.

Enquiath moment, era igualtat d’hemnes e òmes ena vida quotidiana encara non ei ua realitat. Ena practica, hemnes e òmes non gaudissen des madeishi drets, donques persistissen desigualtats politiques, economiques e culturaus –per exemple, diferéncies salariaus.

Entà arténher ua igualtat efectiua d’hemnes e òmes, aguesta lei vò refortilhar es mesures e es mecanismes concrèts entà arténher qu’es poders publics de Catalonha amien a tèrme politiques e accions destinades a eradicar eth fenomèn dera desigualtat entre hemnes e òmes. Aguesta Lei a de perméter bastir naues pautes de relacion entre òmes e hemnes, basades en respècte e era equitat, e tanben contribuïr a melhorar ena societat e hèr-la mès democratica.

En capítol V, era Lei contemple ath delà eth déuer generau des enterpreses de respectar eth principi d’igualtat en encastre laborau, establís especificaments eth déuer d’aprovar e aplicar plans d’igualtat enes enterpreses de mès de dus cents cinquanta trabalhadors.

4ª Corsa dera Hemna d’Aran

Laguens des actes organizadi peth Conselh Generau d’Aran a trauès deth Servici d’Informacion e Atencion ara Hemna (SIAH) eth dimenge 12 de març entas 11 ores, se celebrarà era “4au edicion dera Corsa dera Hemna Val d’Aran”. Era corsa ei daurida a toti e a totes es edats e se pòt hèr corrent o en tot caminar, en un circuit urban de 5km pes carrèrs de Vielha.
Era corsa ei possible gràcies ara collaboracion deth Club Atlètic Val d’Aran (CAVA), deth Conselh Esportiu Val d’Aran, des Voluntaris d’Aran, der Ajuntament de Vielha e Mijaran, e der Institut Català de les Dones dera Generalitat de Catalonha.

Entà mès informacion vos podetz méter eth contacte damb eth SIAH en Carrèr Major de Vielha o ath tel. 973 64 25 60.
Vos podetz inscríuer en: https://www.inscripcions.cat/corsaderahemna2017/