Vielha, 16 d’octobre de 2017.- 155 mainatges e mainades; 46 italians, 49 francesi e uns seishanta aranesi, an participat enes activitats ludiques organizades pera Escòla Garona amassa damb eth GRM (Grop de Rescat de Montanha) des Pompièrs d’Aran, en escambi deth Programa Erasmus +. Activitats que les permeten aprigondir en aguest escambi.

Eth GRM des Pompièrs d’Aran, a premanit tres talhèrs de prevencion e seguretat en montanha, un de “tirolina” en tot crotzar er arriu, d’aute d’iniciacion ath descens damb còrda (ràpel) e eth tresau de rescat de lauegi, damb recèrca damb ARVA e eth materiau que s’utilize en un rescat, que daurissen era possibilitat de desvolopar mès activitats religades damb era prevencion e era seguretat ena montanha entà qu’es mainatges e mainades poguen desvolopar-se damb seguretat en aguest miei.

Aguestes activitats s’includissen laguens der escambi de professors e alumnes en programa Erasmus + “Eth jardin … ena taula, dalla tavola … à la poubelle”, d’educacion infantila, primària e segondària a trauès d’activitats d’ensenhament bi-plurilingüe e digitau que velhen pera gestion der entorn, era biodiversitat, era actitud des consumidors e ciutadans responsables, eth reciclatge, eth reusatge, era alimentacion e educacion entara salut.

Eth projècte va dirigit a un hilat de “partenaires” de tres regions: Lengadòc-Rossellon, Val d’Aosta e Piemont, e era Val d’Aran.

Es alumnes de 6au cors d’educacion primària dera Escòla Garona e alumnes francesi viatgèren pera Val d’Aosta eth passat mes de mai e, ara, aguesta setmana deth 16 d’octobre, 46 alumnes italians e 49 francesi visiten era Val d’Aran. En mai de 2018 es alumnes aranesi e italians viatjaràn entà Losèra (França).