• Aguest nau modèl ei un pas important ena remassada de lordères en territòri, e combinarà eth pòrta per pòrta damb es isles barrades as que se poderà accedir damb era identificacion des usatgèrs e usatgères, un servici que s’implementarà de manèra progressiva.

Eth Conselh Generau d’Aran, amassat en session extraordinària, a aprovat aué, damb es vòts a favor de UA e CDA, era adjudicacion deth contracte mixte deth servici integrau dera remassada e evacuacion de residus dera Val d’Aran e eth servici de redaccion deth projècte executiu e execucion des òbres d’adeqüacion deth centre de transferéncia de residus, a Fomento de Construcciones y Contratas entàs ueit ans que vien mès dus de prorogables.

Era empresa s’encuedarà de gestionar eth nau modèl de tractament de residus, que combinarà era remassada pòrta per pòrta damb es isles barrades as que se poderà accedir damb era identificacion des usatgèrs e usatgères, un servici que s’implementarà de manèra progressiva, modèl adaptat ara naua normativa europèa, qu’a d’èster de plen compliment tath 2050.

Tath conselhèr de Gestion Ambientau e Transicion Energetica, Oriol Sala: “damb aguest nau modèl cercam d’arténher ua optimizacion dera remassada de lordères en territòri, entà garantir ua separacion des fraccions entà minimizar er impacte ambientau que generam, ua gestion mès sostenibla entà obtier ua màger eficiéncia economica”.

Tara sindica d’Aran, Maria Vergés: “se tracte d’un pas istoric tath país, que mos permeterà adaptar-mos a ua airina de qualitat qu’enquiath moment non ère estandarizada, coma ei evident, pr’amor des disparières circonstàncies e caracteristiques. Eth volum de remassada e seleccion ei fòrça naut, sustot en aquerò que hè ara seleccion dera fraccion organica, que non podem assumir”. E a hijut: “Aguest nau modèl ajudarà a evitar imatges deplorables enes punts de remassada e tanben auançar en accions posteriores que s’an d’assumir, com era transicion energetica dera man deth reciclatge”.

Vielha, 26 d’agost 2024