• Entre es accions d’aguest projècte se trape eth Piribus, ua exposicion itinerant qu’arribarà a Vielha eth 25 de seteme

• Aguesta ei ua iniciativa transfonterèra gestionada per mès de 60 entitats que intègren er hilat d’Educacion Pirenèus Vius

Vielha acuelherà entre es dies 25 de seteme e 5 d’octubre eth Piribus, ua accion integrada laguens deth projècte Interreg POCTEFA ADN Pirenèus.

Eth Piribus ei ua exposicion itinerant que, des deth passat 29 de març e enquiath 27 de seteme de 2020, recorrerà 6.000 km deth Pirenèu entà mostrar era realitat d’aguest territòri geografic unic.

Un totau de 32 etapes entre Catalonha, Navarra, Aragon, Andòrra e França. 20 mesi d’itinerancia entà mostrar, escotar, tocar, manipular e experimentar, mès tanben entà remassar e valorar testimònis, punts de vista e percepcions der auviatge naturau e culturau des Pirenèus.

Era exposicion deth Piribus ei dividida en quate airaus: era istòria geografica des Pirenèus, es paisatges, era biodiuersitat e era istòria umana, tot remassat en 72 mètres quarrats plens de descubèrtes sensoriaus, digitaus e ludics.

En tot profitar que pendent es dates qu’aguesta exposicion serà ena Val d’Aran  eth cors escolar dejà aurà dat inici, se vò profitar entà realizar diferents activitats de sensibilizacion damb era mainadèra des escòles araneses.

Tant eth Conselh Generau d’Aran coma er Ajuntament de Vielha e Mijaran an mostrat era sua expressa volentat d’acuélher aguesta exposicion, pr’amor que supause ua mesura d’educacion ambientau de gran importància tath país.

Eth Piribus ei sonque ua des diferents accions deth projècte ADN Pirinèus, gestionat pera Generalitat de Catalonha, era Fundacion Catalunya Pedrera, era Societat Espanhòla d’Ornitologia Birdlife, era societat de Gestion Ambientau de Navarra (NIK-GAN), er Institut d’Estudis Andorrans (IEA) e era Ligue pour la Protection des Oiseaux (LPO), qu’ath delà compde damb era collaboracion de mès de 60 entitats que intègren er hilat transfronterèr d’Educacion Pirenèus Vius (EPV).

Entre d’autes accions, ei previst eth lançament dera APP ADN Pirenèus, que serà un esturment unic d’interpretacion deth patrimòni naturau integrant es dimensions culturau, istorica e sociau, tanben se crearà ua plataforma MOOC (Massive Online Open Courses) concebuda coma ua plataforma educativa a distància a mans de professionaus dera educacion ambientau.

Laguens dera iniciatiua ADP Pirenèus s’està realizant tanben un diagnostic dera Estrategia Pirenenca d’Educacion (EA) e era Avaloracion deth patrimòni (VP), que cerque era milhora dera educacion ambientau en encastre des Pirenèus.

Damb motiu d’aguest trabalh se demane collaboracion entà amplir un qüestionari en linha que ajudarà a obtier informacion sus era situacion actuau e es besonhs futurs dera EA e VP en territòri pirenenc.

En conjunt, eth projècte ADN Pirenèus cerque dar valor ath nòste auviatge mejançant era innovacion e era sensibilizacion, atau coma establir ligams entre es persones vinculades professionaument ara educacion ambientau e promòir dinamiques tranfonterères entà obtier resultats qu’es entitats, de forma individuau, non poirien arténher.