Un des objectius deth convèni signat eth passat mes de noveme entre eth Conselh Generau d’Aran e Telefónica S.A ère melhorar tecnològicament eth repetidor d’Aubàs ara fin de garantir ua major qualitat de servici de telefonia fixa e mobila en Baish Aran.

Eth sindic d’Aran, Carlos Barrera, a manifestat “èrem convençudi qu’aguesta melhora dejà ère efectiva, mès es incidéncies en servici aguesti dies mos hèn dobtar sus aguesta melhora”.

Des deth Conselh Generau d’Aran s’a tornat a coordinar eth traslat damb mòtos de nhèu des tecnicians de Telefónica S.A entà pr’amor de poder restablir eth servici deth repetidor d’Aubàs.

“Era nòsta suspresa a estat aguest madeish maitin quan tot er operatiu dejà ère organizat, es tecnicians an dit que sense era autorizacion deth Departament de Risqui Laboraus dera companhia, non podien desplaçar-se entara zòna d’Aubàs, pr’amor qu’eth risc de lauegii ère maximal (5 de 5)” a soslinhat Barrera, qu’a hijut “fin finau aguesta dificultat a estat superada damb era explicacion qu’era pista forestau d’accès ath repetidor d’Aubàs ei per laguens deth bòsc e eth risc de lauegi ei minim”.

Cap as 10h50 d’aguest madeish maitin an gessut de Vielha direccion Aubàs es tecnicians damb es remolcs e es mòtos de nhèu.

En paraules deth sindic d’Aran, Carlos Barrera, “èm ara demore d’ua explicacion sus eth tipe d’aaveria produsida e, per què maugrat eth convèni signat entre eth Conselh Generau e Telefónica S.A, qu’ena practica auie de solucionar es aspèctes tecnics entà evitar panes, se tornen a produsir”.

Eth Conselh Generau d’Aran met a disposicion era Oficina de Consum entà tramitar es danhs e reclamacions des persones, empreses e establiments afectadi.