Vielha, 10 de noveme de 2017.- Agents de Miei Ambient deth Conselh Generau d’Aran e deth Còs d’Agents Ruraus dera Generalitat, realizèren era setmana passada ua entrada e un registre en un domicili particular de Canejan (Val d’Aran) entà investigar un presomptiu delicte contra era fauna, consistenta ena possession d’espècies protegides dissecades. Jos era direccion deth Jutjat d’Instruccion de Vielha e Mijaran, pendent eth registre en domicili trobèren 40 paums dissecadi, ath delà de d’autes espècies protegides e cinegetiques. Es animaus an estat confiscadi cautelaramente enquia qu’eth proprietari, vesin de Barcelona, pogue acreditar era sua procedéncia legau.

Era accion s’inicièc gràcies ara estreta collaboracion entre eth Còs d’Agents Ruraus e eth Conselh Generau d’Aran, qu’alertèc d’ua casa que s’anonciaue en ua pagina de loguèr d’abitatges per internet, e qu’en ua des fòtos se vedie ua grana vitrina damb diuèrsi exemplars dissecadi de paum.

Eth paum ei ua espècia estrictaments protegida en Catalonha des der an 1979. Era sua poblacion pirenenca se tròbe en ua situacion vulnerabla, e era sua poblacion ena sarrada Cantàbrica ei declarada en perilh d’extincion. Era sua caça ei permetuda en quauqui païsi der Èst d’Euròpa coma Romania.

Damb autorizacion judiciau e damb preséncia dera letrada dera Administracion de Justícia, es agents ruraus enregistrèren er abitatge e es dependéncies annèxes, en tot verificar era possession de 40 exemplars dissecadi de paum, un de paum nère, quate poths de coa forcada, tres gariòles e un becut. Toti aguesti animaus sigueren confiscadi cautelarament e se custòdien en dependéncies deth Còs d’Agents Ruraus, a disposicion judiciau.

Ua orde dera Generalitat avalore economicaments cada paum damb 1.800 €. Era sua possession pòt constituïr un presomptiu delicte contra era fauna, punit damb pena de preson de 6 mesi a 2 ans o multa de 8 a 24 mesi. Era possession tanben constituís ua infraccion administrativa fòrça grèu dera Lei de Proteccion des Animaus, que se sancione damb multa de 2.001 a 20.000 €.

Es membres deth Còs d’Agents Ruraus, damb era collaboracion deth Departament de Territòri e Sostenibilitat, e deth Conselh Generau d’Aran, investiguen era documentacion e es precintes aportadi pera persona investigada, era data dera mòrt des animaus e era sua origina geografica, a fin de determinar era sua situacion legau en Catalonha.