• Dempús de comprovar qu’er animau portaue dies immobil ena zòna de Soberpera, ua patrolha d’Agents de Miei Ambient a trapat eth son cadavre en ua zòna de dificil accès, d’a on a estat rescatat entà realizar era apertient necropsia e conéisher atau era causa dera sua mòrt que, peth moment, se desconeish

Aué, 9 d’abriu, s’a trapat mòrt er os Cachou en municipi de Les. Era senhau recebuda aué peth colièr GPS a permetut comprovar qu’er os hège dies que demoraue anormaument immobil ena zòna de Soberpera.

Immediatament s’a desplaçat ua patrolha des Agents de Miei Ambient deth Conselh Generau d’Aran, qu’an trapat eth cadavre der animau en un endret fòrça escarpat e de dificil accès. Damb era collaboracion des Agents Ruraus dera Generalitat de Catalunya s’a extret eth còs dera zòna entà transportar-lo ara Universitat Autònoma de Barcelona (UAB), a on eth Servici d’Ecopatologia de Fauna Sauvatge realizarà era necròpsia. Peth moment, se desconeish quina pòt èster era causa dera mòrt.

Er os Cachou, un mascle de 6 ans d’edat, siguec capturat hè aproximadament un an ena zòna de Montcorbau. Gràcies ath colièr emissor que se li implantèc, se podèc comprovar qu’auie estat eth causant de diuèrsi atacs realizats ena tardor sus bestiar equin. Pr’amor d’aguest comportament se li apliquèren diuèrses mesures de condicionament aversiu, de manèra qu’er os non auie tornat a atacar a bestiar des de principis d’octobre der an passat.

Ara hège un mes e miei que Cachou auie abandonat era tuta d’iuernacion e s’auie botjat per Mijaran, França e Baish Aran.