Aguesta dimenjada comence era regulacion ath miei naturau enes zònes de mès afluéncia dera Val d’Aran

Enquia seteme, eth Conselh Generau d’Aran regularà er accès a Varradòs, Artiga de Lin, Aiguamòg, Valarties, Bassa d’Oles e Bassa d’Arres a trauès de diuèrsi contròls plaçadi enes accèssi ad aguesti paratges, que limitaràn eth pas segontes era ocupacion que i age enes parcatges entà evitar massificacions

Eth Conselh Generau d’Aran met en foncionament, a compdar de deman, 15 de junhsèga, e enquia seteme, es mesures de regulacion ath miei naturau enes zònes a on istoricament se detecte mès afluéncia pendent er ostiu: Varradòs, Artiga de Lin, Aiguamòg, Valarties, Bassa d’Oles e Bassa d’Arres.

Aguestes mesures s’implantaràn toti es dies enes següents oraris:

Varradòs – De 10:00 a 17:00 ores enquiath 3 de seteme.
Artiga de Lin – De 10:00 a 17:00 ores enquiath 3 de seteme.
Aiguamòg – De 7:30 a 15:30 ores enquiath 10 de seteme.
Valarties – De 7:30 a 15:30 ores enquiath 10 de seteme.
Bassa d’Oles – De 10:30 a 16:30 ores, a compdar deth 29 de junhsèga enquiath 3 de seteme.
Bassa d’Arres – De 10:30 a 16:30 ores, a compdar deth 29 de junhsèga enquiath 3 de seteme.

“Un an mès, eth Conselh Generau d’Aran torne a implementar diuèrses mesures entà regular er accès as principaus airaus d’interès naturau ena Val d’Aran entà, per un costat, garantir era seguretat des usatgèrs e usatgères d’aguestes pistes e melhorar era sua experiéncia e, per un aute, preservar aguesti endrets naturaus e evitar era sua massificacion”, afirmaue eth vicesindic e conselhèr de Governacion, Innovacion, Economia e Torisme, Amador Marqués, en tot híger que: “damb aguestes mesures volem tanben promocionar entre es nòsti visitants d’auti paratges naturaus mens coneishuts coma alternativa as punts mès emblematics e concorruts pendent aguesti mesi”.

Aguesta regulacion s’amiarà a tèrme, coma en ans anteriors, a trauès de diuèrsi contròls plaçadi enes accèssi ad aguesti paratges, que limitaràn eth pas segontes era ocupacion e places liures que i age enes parcatges. Un an mès, Foment Torisme Val d’Aran balharà informacion a temps reau der estat de massificacion d’aguesti punts a trauès dera plataforma AparcAran e dera app toristica GuidAran.

Atau madeish, enes pròplèu dies se plaçaràn pantalhes informatives en diuèrsi punts d’accès ad aguestes zònes entà balhar tanben informacion sus er estat reau d’ocupacion.

Aguesta actuacion se desvolòpe en marc deth Plan de Sostenibilitat Toristica dera Val d’Aran, qu’a coma objectiu melhorar es nòsti entorns naturaus, era mobilitat e era gestion deth nòste territòri a trauès de diuèrses actuacions centrades ena mobilitat sostenibla, era regulacion d’accèssi, era diversificacion dera aufèrta toristica e era implementacion des naues tecnologies entà auançar enquia ua destinacion intelligenta e sostenibla.