-
Eth dimenge 17 entàs 11 ores aurà lòc era Xau Corsa Aran pes Hemnes, qu’enguan eth Conselh Generau d’Aran a plantejat damb un nau modèl que defen ua perspectiva non competitiva, fomente era sororitat entre hemnes e vò eludir era competicion entre eres
Eth Conselh Generau d’Aran, a trauès des sòns Servicis Assistenciaus Integrats e Oficina de Joenessa, en collaboracion damb er Institut d’Aran, es Volontaris d’Aran e Adda, a organizat era Xau Corsa Aran pes Hemnes, qu’enguan presènte un nau modèl de corsa collaborativa per relhèus.
Aguesta corsa, qu’aurà lòc eth 17 de març, se presente coma un eveniment culturau, sociau e simbolic que da supòrt ara visibilitat e resisténcia des hemnes en nòste territòri.
Aguest modèl nau defen ua perspectiva non competitiva, fomente era sororitat entre hemnes e vò eludir era competicion entre eres. Ei ua corsa a on se participe en grop! E er objectiu des relhèus ei hèr a passar un testimòni de man en man entà lieger-lo en acabar.
Eth recorrut compde damb quate endrets clau, eth prumèr e eth darrèr des quaus ei era Plaça d’Aran, deuant deth Conselh Generau d’Aran. En cada endret clau i aurà un grop de gent, damb es persones que s’encueden de portar eth relhèu damb drapèus qu’encoratgen as participants dera corsa e que demoren qu’arribe eth grop anterior. Quan eth grop anterior age arribat, se harà eth cambi de relhèu entà que ues autes hemnes daurisquen era corsa e pòrten eth testimòni, e es dus grops amassa seguiràn corrent ath darrèr sòn.
Es grops seràn acumulatius e aguesta dinamica serà succesiva enquiath tresau endret, a on se harà eth darrèr cambi de relhèu e aquiu, toti e totes amassa, poiram entrar ena “arribada en grop” ath darrèr des persones encargades de portar eth relhèu. Totes es persones participantes ena corsa auràn de demorar darrèr des persones que pòrten eth testimòni, en tot auançar atau, toti amassa.
Eth 17 de març tàs 11h començarà era corsa, mès a compdar des 10h i aurà membres dera organizacion en toti es punts de relhèu entà liurar a totes es persones participantes eth dorsau e un present pera sua participacion.
Ena inscripcion, se demanarà as participants en quin lòc s’i vòlen híger, e se haràn grops en cada endret. Ei important que totes es persones inscrites vagen tath punt a on s’agen inscrit entà poder organizar eth materiau e èster prèstes entà quan comence era corsa. Es inscripcions se pòden realizar en aguest ligam: