Imatge: Jaime Varela

• En sòn 45 aniversari, era Marxa Beret, era competicion populara d’esquí de hons mès multitudinària d’Espanha,  entre ath prestigiós circuit “Ski Classics Challengers” e aufrirà era publicacion des resultats en streaming e totes es imatges descarregables ara sua pagina web. Ath delà, sortejarà dus esquís Salomon entre toti es inscrits online.

Entà commemorar ua des competicions d’esquí de hons mès antigues, era Marxa Beret, organizada peth Conselh Generau d’Aran e Baqueira Beret, damb era collaboracion dera RFEDI, era Federacion Catalana Espòrts d’Iuèrn (FCEH) e es ajuntaments de Naut Aran, Vielha Mijaran, Volentaris d’Aran, ADDA e Pompièrs-Emergéncies, hestège era sua 45 edicion damb mès beneficis entàs participaires.

Celebram aguesta 45 edicion damb ua importanta hita entara Marxa Beret, pr’amor  qu‘enguan auem entrat en circuit “Ski Classics Challengers” çò que mos apòrte major visibilitat a nivèu europèu, sustot entre es esportistes de païsi damb grana aficion per esquí de hons coma es païsi nordics, Itàlia e França, en tot plaçar ara Val d’Aran coma territòri ideau entara celebracion d’eveniments d’espòrts de nhèu de grana acuelhuda.

Maugrat qu’er an passat era organizacion creèc un nau circuit entà iniciar-se en aguest espòrt damb era Mini Marxa Beret damb un recorregut de 5 km, enguan, arribe damb mès cambis damb era publicacion a temps reau des resultats, tant en ua grana pantalha installada en Plan de Beret, coma per streaming ena pròpria web dera marxa. Ath delà, toti es participaires poderàn descargar es sues imatges, tant dera gessuda coma dera arribada, des competicions deth dissabte e eth dimenge, atau coma, eth vidèo resum des melhors moments d’aguesta edicion de manèra gratuïta dirèctament ena web: www.marxaberet.com.

Imatge: Jaime Varela

Es Campionats d’Espanha de Sprint by Iberdrola arrinquen aguest dissabte 1 de hereuèr entàs 10 ores en Plan de Beret. Pera tarde, tàs 19 ores, aurà lòc eth liurament de prèmis d’aguest campionat e era presentacion dera 45au. edicion dera Marxa Beret ena Sala Polivalenta de Vielha, a on tanben se realizarà eth sorteg de 2 esquís de hons dera mèrca Salomon. Arrebrembam qu’es inscripcions presenciaus se pòden hèr aué, diuendres de 16 a 20 ores e eth dissabte de 9 a 21 ores ena sedença deth Conselh Generau, ena Plaça d’Aran.

Aguesta ja mitica competicion populara, se realizarà eth dimenge 2 de hereuèr tàs 10 ores, eth recorregut mès long comptabilizarà entàs Campionats d’Espanha FIS de Longa Distància, e i aurà quate circuits que recorreràn es zònes de Beret e Orri: de 5 km, 10 km, 18 km e 31 km, aquestes distàncies s’an auut d’adaptar ath terrenh pensant en garantir era seguretat des participaires. Eth liurament de prèmis se harà tàs 13.30 h en Plan de Beret.

Era Marxa Beret ei fòrça mès qu’ua competicion, ei ua des pròves qu’acuelh  tant a fondistes nacionaus coma internacionaus, e aufrís ath public familhau e grops d’amics era possibilitat de participar amassa damb esportistes de naut nivèu, en tot èster ua hèsta der esquí de hons unica.

Ath delà, ena Val d’Aran a nheuat pendent tota era setmana çò que balhe excellentes condicions de nhèu e es previsions meteorologiques parlen d’un dimenge damb fòrça bon temps. 

Trobaratz tota era informacion ena web: www.marxaberet.com e as nòsti hilats sociaus, Instagram: marxa_beret e Facebook: Marxa Beret.

Vielha, 31 de gèr de 2025