Albert Ortega, Eduardo Puente e Aingeru Garai.

Segons a comunicat era Real Federación Española de Deportes de Invierno (RFEDI) es esportistes de tecnificacion d’esquí aupin dera FCEH: Aingeru Garai deth CAEI e Albert Ortega de LMCE an estat seleccionadi entà integrar-se as estructures esportiues dera RFEDI. Es tecnics dera RFEDI an tengut en compde es resultats esportius obtengudi pendent era passada sason e an considerat era sua projeccion esportiua de futur.

Aingeru Garai e Albert Ortega, qu’entrenen en Centre de Tecnificacion d’Espòrts d’Iuèrn dera Val d’Aran (CETEI), an artenhut pendent era sason podiums en Campionat d’Espanha Juvenil. Garai s’a proclamat Campion d’Espanha d’Eslalom Juvenil U18 e Ortega subcampion ena madeisha categoria. Ath delà an obtengut era 1a e 2au posicion U18 respectivaments en Eslalom FIS de Peyragudes- Val Louron (França).

Eduardo Puente, director deth CETEI Val d’Aran, a manifestat “tà Aingeru e tà Albert ei un moment fòrça important enes sues carrères esportiues pr’amor qu’entrenaràn damb es sòns referents nacionaus e comportarà era participacion en pròves de naut nivèu internacionau coma es campionats d’Euròpa, Jòcs Olimpics Infantils, Mondiaus Juniors,…”.

Puente a soslinhat “de 5 components d’esquí aupin des estructures dera RFEDI, 4 an gessut deth CETEI Val d’Aran: Juan del Campo, Álex Puente, Aingeru Garai e Albert Ortega”.

Eth Centre Especializat de Tecnificacion Esportiua d’Espòrts d’Iuèrn dera Val d’Aran dauric es sues pòrtes er an 2012 dempús deth convèni signat peth Conselh Generau d’Aran, eth Consell Català de l’Esport dera Generalitat de Catalunya e era Federació Catalana d’Esports d’Hivern, en tot èster eth Centre titolaritat deth Conselh Generau d’Aran.

Aguesta infrastructura servís entà formar a joeni esportistes e plaçar-les ena elèit des espòrts d’iuèrn a nivèu internacionau.

Eth Centre de Tecnificacion Esportiua d’Espòrts d’Iuèrn dera Val d’Aran, restacat ara Real Federación Española de Deportes de Invierno (RFEDI) e ara Federació Catalana d’Esports d’Hivern (FCEH), a per objectiu ajudar ara progression de joenes promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medicau/psicologic entà garantir un estat de salut adaptat entara practica esportiua e ua gessuda professionau de futur.

Era formacion academica la realizen en IES d’Aran e ath delà compden damb eth gran supòrt de Baqueira Beret, ua des estacions d’esquí mès prestigioses deth mon, a on es components deth CETEI an installat eth sòn camp base.

Vielha, 13 de mai de 2016

Conselh Generau d’Aran: Núria Sanjuan