Ajudes der Estat e era Generalitat entath pagament deth loguèr pr’amor dera crisi deth COVID-19

Er airau sociau deth Conselh Generau d’Aran prestarà era sua ajuda ena tramitacion d’aguestes subvencions as persones que volguen sollicitar-les

Deuant era crisi deth COVID-19 son fòrça es persones que se trapen en ua situacion economica dificila e, pr’amor d’aguest motiu, des deth govèrn deth Conselh Generau d’Aran se vò facilitar tota era informacion sus es ajudes e subvencions que poguen ajudar ara ciutadania aranesa a hèr front ad aguesta situacion.

Es persones que volguen sollicitar aguestes ajudes auràn de contactar damb era Oficina de Joenessa deth Conselh Generau d’Aran entà gestionar es agendes e atencions, as telefons 973640625 o 680415451.

Per un costat, eth Ministèri de Transpòrt, Mobilitat e Agenda Urbana aufrís ua subvencion entath pagament deth loguèr destinat a persones fisiques que complisquen es següents requisits:

Acreditar era residéncia legau en Catalonha
Auer uns ingrèssi (der an 2018) dera unitat de convivéncia sufisents entà poder pagar eth loguèr e que non supèren eth maxim establit enes bases dera convocatòria (a excepcion des victimes de terrorisme).
Èster titular deth contracte de loguèr der abitatge que constituís eth sòn abitatge abituau e permanent e èster-i empadronat.
Acreditar eth pagament dera fiança.
Non pagar un loguèr mensuau superior a: 450 € ena Demarcacion de Lhèida o 900€ en cas des familhes nombroses.
Auer domiciliat eth crubament dera subvencion en ua entitat financèra.
Èster ath dia en pagament des rendes de loguèr en moment dera presentacion dera sollicitud.
Pagar eth loguèr per miei de: transferéncia bancària, ingrès en compde bancari, rebut domiciliat o rebut emès per administrador dera finca, aumens a compdar deth mes següent ara data de presentacion dera sollicitud.
Non èster sometut a cap des supòsits de proïbicion entà èster beneficiari de subvencions.
Complir damb es obligacions tributàries deuant der Estat, era Generalitat e era Seguretat Sociau.

Eth termini de presentacion d’aguesta ajuda finalize eth 3 de junhsèga de 2020.

Pera sua part, era Generalitat de Catalunya aufrís ues ajudes entà contribuír a minimizar er impacte economic e sociau deth COVID-19 enes loguèrs. Entà poder èster beneficiaris d’aguestes ajudes, es persones que les solliciten an d’acreditar èster en situacion de vulnerabilitat economica e sociau sobrevinguda a conseqüéncia deth COVID-19 mejançant eth compliment des requisits següents:

Quinsevolh des membres dera unitat familhau (UF) a de:
- Èster en situacion de caumatge
- Èster afectat per un Expedient Temporau de Regulacion d’Aucupacion (ERTO)
- Auer patit ua reduccion dera jornada de trabalh per motius de suenhs, en cas d’èster empresari
- Auti motius que supausen pèrta d’ingrèssi
Es ingrèssi mensuaus dera UF, en mes anterior ara sollicitud, non an d’èster superiors a 3 còps IPREM (1.613,52€). En cas des familhes damb persones damb discapacitat varie en foncion deth grad e tipologia dera discapacitat.
Qu’era renda de loguèr, mès es despenes e subministraments basics der abitatge (lum, gas, gasoil, aigua, telefòn quòta de comunitat) resulte superiora o parièra ath 35% des ingrèssi nets dera UF.
Acreditar era residéncia legau en Catalonha.
Èster titular deth contracte de loguèr der abitatge que constituís eth sòn abitatge abituau e permanent e èster-i empadronat.
Acreditar eth pagament des mensualitats de gèr, hereuer e març 2020.
Qu’er impòrt deth loguèr mensuau sigue màxim de 900 €.
Non èster sometut a cap des supòsits de proïbicion entà èster beneficiari de subvencions.
Complir damb es obligacions tributàries.