Pendent aguesta setmana, 24 alumnes dera Facultat d’Infermeria e Fisioterapia dera UdL que realizen eth Màster d’Infermeria aplicada a les cures en l’àmbit d’emergències an realizat ues simulacions damb es Pompièrs d’Aran en Parc de Vielha.

Era demanda de servicis sanitaris d’atencion ara poblacion en situacions que requerissen ua responsa immediata, coma es accidents de transit, es urgéncies domiciliàries o es plans d’emergéncies e catastròfes, a experimentat un creishement constant pendent es darrèri ans. Eth pronostic des persones que patissen aguestes situacions depen, en grana mesura, dera qualitat dera assisténcia qu’arreceben pendent es prumères menutes.

Coma responsa ad aguesta tendéncia, enes darrèri ans es autoritats sanitàries amien a tèrme un plan d’implantacion d’Unitats d’Atencion immediata, bères ues que ne son restacades a servicis d’Urgéncies d’Espitaus comarcaus, e d’auti a empreses de capitau public, coma eth SEM (S.A.), qu’ei era empresa publica encargada de gerir e dar responsa as demandes d’Assisténcia d’Urgéncia e emergéncia sanitària extra espitalaria en Catalonha.

Cau qu’es professionaus sanitaris qu’atien aguesti casi, ei a díder, es mètges, infermièrs e tecnicians de transpòrt sanitari que conformen era unitat mobila, agen ua formacion especifica entath desvolopament dera Atencion Pre espitalaria Urgenta.

Damb aguest objectiu, era Facultat d’Infermeria e Fisioterapia dera Universitat de Lhèida (UdL) dispòse d’un mastèr nau que permet as infermièrs/es desvolopar es sues carrères professionaus en camp dera atencion pre espitaleria, e que facilite e permete as professionaus investigar, planificar, formar e organizar aqueres situacions que requerissen assisténcia sanitària immediata.

En aguest sens, eth mastèr aprigondís ena atencion integrau pre espitalaria damb caractèr urgent e ena coneishença d’aspèctes coma eth “transfer” extra espitalari- espitalari, era urgéncia espitalaria, es suenhs ath malaut critic en encastre espitalari, era atencion sanitària urgenta es situacions especiaus (miei aquatic, rescat ena montanha, atencion a multiples victimes es emergéncies e catastròfes) e apòrte es estruments e abiletats de gestion entà atier aguesti pacients en tèrmes de maximala eficiéncia e qualitat.