Vielha, 12 de junhsèga de 2018.- Eth passat 9 de junhsèga auèc lòc ua naua amassada de coordinacion ena Direccion Generau de Politiques Miei Ambientaus en Barcelona entà contunhar auançant en toti es aspèctes tecnics e legaus sus era gestion der os ròi en Pirinèu.

Per part dera Generalitat èren presents eth director generau de Polítiques Ambientals Ferran Miralles e eth cap del Servei de Fauna i Flora, Ricard Casanoves. Per part deth Conselh Generau d’Aran eth sindic d’Aran, Carlos Barrera, eth conselhèr d’Agricultura, Ramaderia e Miei Ambient, Jose Enrique Arró e eth responsable de Miei Ambient, Ivan Afonso.

Es qüestions tractades se centrèren en desvolopar es cinc punts aprovadi per unanimitat peth Plen deth Conselh Generau d’Aran, deth 15 de junh, relacionadi damb era gestion der os e sustot pera alarma sociau e afectacion ath sector ramadèr pes reitiradi atacs der os Goiat.

Era prumèra question tractada siguèc era demana de captura e retirada der os Goiat deth Pirenèu. Per part deth Conselh s’informèc de totes es mesures disuasòries que s’an aplicat enquiara e que formen part deth protocòu provisionau pendent de ratificacion. Eth protocòu definitiu s’aprovará en eth marc deth Grop de Coordinacion Intergovernamentau.

Tanben s’acordèc formalizar eth Grop de Coordinacion Intergovernamentau der Os deth Pirinèu, qu’a coma objectiu milhorar era operativitat sus era gestion des ossi en Pirinèu. Aguest grop de trebalh serà format unicament pes representants des Administracions damb un maxim de dus membres per cadua d’eres (Ministerio de Agricultura y Medio Ambiente deth Govèrn Centrau, Generalitat de Catalunya, Gobierno de Aragón, Gobierno de Navarra, Conselh Generau d’Aran e Oficce National de Chasse et de la Faune Sauvage).

Tanben se prenèc er acord de que eth Conselh Generau d’Aran amiarà era redaccion deth protocòu e en darà traslat ara direccion generau de Politiques Ambientals entà qu’aguesta la comunique a totes es autes administracions implicades. Aguest protocòu ei eth que possibilitarà aplicar es mesures de besonh enta minimizar o eliminar es afectacions provocades pes ossi “conflictius” e atau poder agilizar era presa de decisions.

Per çò que hè as responsabilitats que se poguen derivar en cas d’un atac o incident d’un exemplar d’os damb es persones, s’a demanat qu’es servicis juridiques deth Departament de Polítiques Ambientals redacten er informe pertinent. En aguest sens, en tot enténer que, damb er actuau modèl d’indemnizacions únicament li correspon ath Conselh Generau d’Aran era gestion, tramitacion e pagament des mateixes ath bestiar e ara apicultura.

Per çò que tanh ara redaccion d’un estudi sus era poblacion d’ossi que pòt suportar era Val d’Aran e era rèsta deth Pirenèu catalan, (un des punts der acòrd deth Plen deth Conselh), se tractèc sus era activitat socioeconomica deth Pirenèu, en tot diferenciar tempsi pasadi ena qu’era presència der os ère practiment inexistenta, ara realitat actuau dera poblacion der os e eth sòn creishement de futur que pòt méter en risc er actuau modèl de ramaderia extensiva de nauta montanha e inclús afectar eth destin toristic qu’ei eth principau motor econòmic deth territòri.

Aguest estudi tanben a de contemplar que damb era realitat d’un Pirenèu umanizat quina a d’èster era poblacion d’os que se pòt suportar sense qu’aguest equilibri se veigue descompensat en un o aute sens.

Eth sindic d’Aran informèc en aguesta reünion era decision deth Conselh de demanar ua amassada conjunta damb es departaments de Territori i Sostenibilitat e Agricultura, Ramaderia, Pesca i Alimentació, en tot enténer qu’era gestion der os en Pirinèu afècte as dus departaments e que solet damb ua eficaça collaboracion se pòt auançar ena presa de decisions e ena aplicacion des mesures tecniques e economiques que poguen garantir era perviuença des activitats ramadères e toristiques en Aran e en Pirenèu.