• Era sindica d’Aran e eth vicesindic dusau s’an amassat aguest maitin damb era alcaldessa e eth tinent d’alcalde de Bossòst entà tractar sus era collaboracion deth Conselh Generau d’Aran ena reabilitacion dera bastissa der antic cinèma deth municipi

Aguest maitin, era sindica d’Aran, Maria Vergés, e eth vicesindic dusau, Francés Bruna, an mantengut ua amassada damb era alcaldessa de Bossòst, Montserrat de Burgos, e eth tinent d’alcalde, Francisco Rodríguez, entà tractar sus era collaboracion deth Conselh Generau d’Aran ena reabilitacion dera bastissa der antic cinèma deth municipi.

Pendent era amassada, eth govèrn d’Aran a trasladat ar Ajuntament era volontat d’arténher un acòrd entà collaborar economicament damb era reabilitacion d’aguesta bastissa, qu’ei proprietat deth consistòri.

S’a convengut qu’er Ajuntament de Bossòst pogue presentar ath Conselh Generau eth projècte de melhora e emplec der equipament entà conéisher quina ei era volontat deth consistòri damb aguesta bastissa e que se pogue ajustar as objectius de govèrn dera maxima institucion aranesa.

En aguest sens, ena passada legislatura, es anteriors govèrns d’andues institucions auien acordat aguesta collaboracion entà destinar er equipament der antic cinèma coma centre culturau e viuer d’empreses e espaci coworking, entà balhar supòrt as joeni emprenedors.

Dempús dera amassada mantenguda aué, andues institucions s’an emplaçat a seguir tractant aguest ahèr pendent es pròplèu setmanes, un còp er Ajuntament age hèt arribar ua propòsta mès detalhada sus er emplec e melhora der equipament.