Vielha, 26 d’octobre de 2018.- Era passada setmana debanèc en Conselh Generau d’Aran ua amassada de trabalh deth Seminari pirenenc espanhòu e andorran en qué participèren era conselhèra de Torisme d’Aran, Anna Díaz, e eth director comerciau de Baqueira Beret, Xavier Ubeira, amassa damb Anne Marie Fabre, directora adjunta en Espanha d’Atout France, agéncia de desvolopament toristic de França, e Magali Ferrand, directora delegada dera Direccion de Torisme e Termalisme deth Comitat Regionau d’Occitània, entre d’autes.

Era activitat toristica ei un sector estrategic de grana importància entà França e entara region d’Occitània que, damb mès de 30 milions de visitants, 108.000 lòcs de trabalh toristic e un volum de negòci de 14.000 milions d’èuros de consum toristic, place era region d’Occitània coma eth prumèr lòc de freqüentacion toristica deth país vesin.

Es amassades mantengudes pendent es tres dies deth seminari aueren coma objectiu era metuda eth comun de diferenti aspèctes restacadi damb era activitat toristica de present e de futur as dus costats des Pirenèus, entre eri, eth clima coma un des compausants fonamentaus deth torisme, er impacte deth cambi climatic en sector toristic de montanha, e identificar estrategies que permeten arrespóner as expectatives a cuert e mejan termini entàs pròplèus decènnis.

Era confirmacion der escauhament globau a hèt que bères estacions d’esquí agen ja realizat importantes inversions per çò qu’ei era nhèu de cultiu, en usatge d’elements naturaus entà plaçar es pistes, analisar es fluxi entà préner en compde es besonhs des clients era matèria de seguretat as pistes, era gestion des recorsi naturaus e era sensibilizacion des toristes mejançant era difusion de bones practiques en un contèxt de desvolopament sostenible.

Referent ad açò darrèr, cau arrebrembar qu’era Val d’Aran a entrat a èster part recentaments deth Hilat de Destinacions Toristiques Intelligentes (DTI) impulsada peth Ministèri de Torisme d’Espanha damb era collaboracion de Segittur e de Red.es, laguens d’un nau modèl toristic que junh concèptes coma era sostenibilitat, era accessibilitat, era governança publica-privada, era innovacion e era tecnologia entà enfrontar-se as rèptes toristics deth present.

En aguest sentit era conselhèra de Torisme d’Aran, Anna Díaz, destaquèc qu’eth Hilat de Destinacions Toristiques Intelligentes permeterà a Torisme Val d’Aran méter en foncionament estrategies entà melhorar era aufèrta toristica, atau coma méter en valor e dar visibilitat es esfòrci publics e privadi deth sector toristic aranés coma motor economic, ath delà de compdar damb era estacion d’esquí mès important deth sud des Pirenèus com ei Baqueira Beret. era Val d’Aran hè ja 3 ans qu’era collaboracion damb Segittur participe en programa pilòt de Destinacions Toristiques Intelligentes de Montanha.

Anna Díaz afirmèc qu’era adesion dera Val d’Aran ath Hilat de Destinacions Toristiques Intelligentes permet auançar cap a un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, que contribuís ath hèt qu’era Val d’Aran sigue ua destinacion toristica basada ena promocion deth sòn ric auviatge e dera sua cultura, amassa damb eth respècte pera riquesa naturau deth territòri.