Vielha, 24 de mai de 2016.- Eth conselhèr de Territòri deth Conselh Generau d’Aran José Antonio Boya, s’amassèc ager damb es bailes de Les, Bossòst, Canejan, Arres e Vilamòs, entà activar eth projècte dera rota d’accès ath Tuc deth Montlude, qu’es responsables deth Govèrn d’Aran hè un temps que i trabalhen. Se tracte de dessenhar ua naua aufèrta d’activitat de montanha entath Baish Aran e Irissa.

Eth projècte, consistís en senhalizar er accès ath Tuc deth Montlude de 2.518m de nautada que poderà èster accessibla des des cinc pòbles.

Eth Conselh Generau d’Aran e er Ajuntament de Bossòst collaboraràn ena recuperacion deth camin de Margalida que se poderà utilizar entà iniciar aguesta rota des dera madeisha poblacion. Pera sua part eth conselhèr de Territòri, demanèc era implicacion deth rèste d’ajuntaments entà que participen, amassa damb eth Conselh Generau d’Aran, ena neteja de quauqui uns des camins tradicionaus qu’actuauments se tròben fòrça emboscadi, a fin de facilitar er accès ara rota des des pòbles respectius.

Er objectiu deth Govèrn d’Aran, ei potenciar eth Montlude coma un referent de nauta montanha entàs terçons d’Irissa e Quate Lòcs e optimizar es sòns valors naturaus. Aguest hèt hè deth projècte fòrça atractiu donques qu’era rota d’accès e descens pòt èster diferenta damb fin tostemp en un des cinc pòbles.