• Eth vicesindic e conselhèr d’Economia, Torisme e Promocion Economica, Juan Antonio Serrano, s’a amassat aué en Madrid damb era subdirectora de Supòrt ara Competitivitat deth Petit Comèrç, Maria Ángeles Rodriguez, damb qui a tractat diuèrsi ahèrs relacionadi damb era dinamizacion e reactivacion deth petit comèrç ena Val d’Aran e d’autes zònes toristiques de montanha e transfronterères

Eth Conselh Generau d’Aran, a trauès de Foment Torisme Val d’Aran, se trape en un procès fòrça auançat de desvolopament d’un plan de dinamizacion economic-comerciau entà estimular eth comèrç en territòri.

En marc d’aguest plan de dinamizacion, eth vicesindic e conselhèr d’Economia, Torisme e Promocion Economica, Juan Antonio Serrano, s’a amassat aué en Madrid damb era subdirectora de Supòrt ara Competitivitat deth Petit Comèrç (Ministèri d’Industria, Comèrç e Torisme), Maria Ángeles Rodríguez, e eth sòn equip, entà tractar diuèrsi ahèrs relacionadi damb era reactivacion deth comèrç en territòris de montanha e transfronterèrs coma era Val d’Aran.

“En aguesta amassada auem parlat sus quines serien es alternatives mès indicades entà destinar es hons europèus a accions que dinamizen eth petit comèrç des zònes ruraus coma era Val d’Aran, qu’a vist fòrça afectada era sua activitat economica e comerciau pr’amor dera pandèmia”, asseguraue Serrano, en tot híger que: “les è prepausat profitar es caracteristiques dera Val d’Aran coma territòri toristic, de montanha e transfronterèr entà idear estratègies que permeten cercar naues possibilitats de futur entath petit comèrç”.

Aguesta amassada a servit entà apropar era realitat des comerciants des territòris que, coma Aran, an vist fòrça afectada era sua situacion economica deuant des restriccions pera COVID.

“En aguesti moments, eth comèrç locau se trape en ua situacion fòrça complicada e, per aguest motiu, eth govèrn deth Conselh Generau d’Aran vò, damb eth desvolopament deth plan de dinamización economic-comerciau, dinamizar e reactivar aguest sector en tot trabalhar amassa damb es persones que se i dediquen ena Val d’Aran, entà cercar naues oportunitats e diversificar era nòsta economia de cara ath futur”.