• Ager auec lòc era prumèra trobada entre eth govèrn deth Conselh, er Ajuntament de Vielha e Mijaran e eth departament de Cultura dera Generalitat entà articular es accions a desvolopar que se desprenen der acòrd de govèrn deth passat mes de març peth qué s’impulse eth foment dera lectura

Eth Conselh Generau d’Aran acuelhec ager era amassada sus eth foment der aranés enes bibliotèques de Catalunya, ara quau assistiren era vicesindica d’Aran, Maria Vergés, era directora generau de Creacion, Accion Territoriau e Bibliotèques dera Generalitat, Àngels Ponsa, eth cap deth Servici de Bibliotèques, Pep Vives, eth director territoriau de Cultura de Lleida, Miquel A. Cullerès, era cap dera Central de Bibliotèques de Lleida, Nati Moncasí e eth tinent d’alcalde de Vielha e Mijaran, Alberto López.

Es objectius d’aguesta amassada èren, entre d’auti, fomentar era lectura ena Val d’Aran, esténer es servicis bibliotecaris a tota era poblacion, impulsar es bibliotèques dera Val d’Aran e potenciar eth coneishement dera lengua e literatura araneses en conjunt de Catalunya.

Aguesti objectius se pretenen desvolopar a trauès de diuèrses actuacions coma elaborar un plan de foment dera lectura especific entara Val d’Aran en collaboracion damb es institucions politiques e culturaus o era creacion dera Comission de Lectura d’Aran.

Er acòrd mès subergessent a estat era creacion d’ua comission de trabalh formada per representants deth Conselh Generau d’Aran, Ajuntament de Vielha e Mijaran, coma gestor dera Bibliotèca Generau de Vielha, eth Departament de Cultura de Catalunya, atau coma representants der airau educatiu, qu’aurà coma objectiu fomentar era preséncia der aranés enes bibliotèques a trauès de diuèrses activitats que coordinarà era madeisha comission.