Vielha, 11 de junhsèga de 2018.- Eth Conselh Generau d’Aran a acuelhut era darrèra reünion entà premanir era seguretat e coordinacion deth pas deth Tour de França 2018 pera Val d’Aran. Ena amassada i an participat eth conselhèr de Territòri d’Aran, José Antonio Boya, es responsables des còssi e fòrces de seguretat e de Pompièrs e Emergéncies d’Aran.

Era 16au etapa deth Tour de França deth 24 de junhsèga, damb gessuda en Carcasona e arribada a Bagnères de Luchon damb 218 Km, passarà pera Val d’Aran (Les e Bossòst), en tot entrar per Pontaut, ena termièra aranesa damb França e en tot gésser peth Còth deth Portilhon en direccion entà Luchon damb un recorregut totau de 18 quilomètres, que seràn es unics dehòra des termières franceses de tot eth recorregut deth Tour 2018.

Ath sòn pas pera Val d’Aran es ciclistes encararàn es 8 quilomètres dera pujada deth Còth deth Portilhon, de dusau categoria, damb rampes deth 6,85% de mejana e a 1.293 mètres d’altitud.

Era 17au etapa gesserà a compdar de Bagnères de Luchon en direccion a Saint Lary Soulan, hèt qu’implique que fòrça des equipes dera edicion deth Tour d’enguan haràn net es establiments otelèrs dera Val d’Aran, aspècte que tanben s’a previst ena amassada locau de seguretat.