Aué a auut lòc en Conselh Generau d’Aran ua amassada transfronterèra deth grop de trabalh der os entà parlar sus er estat actuau e mesures futures deth cas dera ossardeta Aubèrta. Eth grop de trabalh lo formen tecnics des administracions pirenenques damb competéncies sus era espécie (Ministèris francés, andorrà e espanhòu, govèrns de Navarra, Aragon e Catalonha e Conselh Generau d’Aran).
Pendent era amassada s’a arribat ara conclusion qu’eth desvolopament dera ossa ei eth corrècte, tant fi­sic coma deth sòn comportament, e que donques era opcion de retornar-la ara vida sauvatja contunhe d’èster viabla e damb notables gatges d’exit.

Ena amassada s’an abordat aspèctes tecnics coma era epòca e eth lòc de liurament e es sistèmes de seguiment que se preven emplegar. Per çò qu’ei deth moment deth liurament, aguest aurà lòc un viatge auançat er iuèrn e depenerà dera disposicion d’aliments ara fin dera tardor e dera climatologia. Per çò qu’ei deth lòc de liurament, eth Conselh Generau d’Aran damb eth supòrt dera Generalitat e d’acòrd damb un document francés en quau s’analisaue era viabilitat der os en Pirenèu, a prepausat era possibilitat de translocar era ossa en Pirenèu occidentau, a on sonque i demoren dus mascles. Es govèrns d’Aragon e Navarra an refusat liberar-la as sòns territòris pera manca de temps entà realizar era sufisenta concertacion sociau. Manque era responsa deth govèrn francés, eth quau ei previst qu’arrecebe un comunicat deth Ministèri espanhòu en tot explicar era oportunitat que supause aguesta ossa. Fin finau, s’a acordat que s’equiparà ar animau damb mèrques visuaus enes aurelhes, un emissor gps e un emissor de radioseguiment convencionau.