Era sous-préfète de Saint Gaudens, Marie Paule Demiguel, visite tanben eth Museu dera Val d’Aran

Pendent era amassada de trabalh s’an abordat diferenti aspèctes dera collaboracion transfronterièra, relacionadi damb era seguretat e Proteccion Civiu, eth programa de reintroduccion der os brun en Pirinèu e era gestion der arriu Garona

El Conselh Generau d’Aran apèle ara sensibilitat deth Govèrn francés entara extraccion deth miei der ois Goiat

Vielha, 26 d’octobre de 2018.- Es sous-préfète de Saint-Gaudens, Marie Paule Demiguel, a visitat era Val d’Aran a on a mantengut ua reünion de trabalh damb eth Conselh Generau d’Aran e a realizat tanben ua visita ath Musèu dera Val d’Aran.

Pendent era amassada de trabalh s’an abordat diferenti aspèctes dera collaboracion transfronterièra, restacadi damb era seguretat e emparament civiu, eth programa de reintroduccion der os brun en Pirenèu, era gestion der arriu Garona e eth trafic de transpòrt pesant enes dus costats dera termièra, entre d’auti.

Ara jornada de trabalh i an participat per part der estat francés, era sous-préfète de Saint Gaudens, Marie Paule Demiguel; Jean Marc Laforet, ambassadeur du conseil diplomatie au près du préfet de la Région Occitanie; Alain Castel, president dera Comunauté de Communes Pyrénées Haut Garonnaises (CCPHG); Joël Gros, vice-président CCPHG; Sylvie Gibiard, directrice général CCPHG; e Assumpta Guixot, Assistante Coopération transfrontalière CCPHG.

Per part deth Conselh Generau d’Aran i an participat César Ruiz Canela, vicesindic d’Aran; Francesc Medan, conselhèr de Governacion; José Antonio Boya, conselhèr de Territòri; José Enrique Arró, conselhèr d’Agricultura, Ramaderia e Miei naturau; e Pau Perdices, cap deth Gabinet de Sindicatura deth Conselh Generau d’Aran.

Marie Paule Demiguel a expressat pendent era jornada de trabalh era intencion deth Govèrn francés d’aprigondir e auançar ena cooperacion transfronterièra per çò qu’ei era seguretat des persones e ena Proteccion Civiu, atau coma ja se ven en tot hèr des de hè ans damb era collaboracion que manten era region francesa damb eth Conselh Generau d’Aran era atencion sanitària e eth servici de Pompièrs e Emergéncies d’Aran o era prevencion e accion en cas d’accidents enes tunèls de Saint Béat e de Vielha.

Per part deth Conselh Generau d’Aran, eth conselhèr d’Agricultura, Ramaderia e Miei naturau, José Enrique Arró, a apelat ara sensibilitat der Estat francés ena collaboracion per çò qu’ei era extraccion deth miei der os Goiat, entà qu’eth Govèrn Francés participe en protocòu que s’elabòre entà actuar deuant eth comportament anomal d’aguest exemplar e collabòre damb eth compliment des acòrds prenudi laguens deth projecte PirosLife. En aguest sens, eth conselhèr a arrebrembat er acòrd deth plen deth Conselh Generau d’Aran e era Generalitat de Catalonha de retirada der os Goiat deth Pirenèu.

Pendent era reünion tanben s’an abordat aspèctes restacadi damb era gestion der arriu Garona. En aguest sentit, eth conselhèr de Territòri, José Antonio Boya, a demanat era collaboracion deth Govèrn Francés a trauès deth SMEAG (Syndicat Mixte d’Études et Aménagement de la Garonne) e era CHE (Confederación Hidrográfica del Ebro) qu’ei er organ governamentau espanhòu que a es competéncies enes accions sus er arriu Garona ath sòn pas pera Val d’Aran.

Era seguretat ena circulacion e era nauta densitat de transit de transpòrt pesant de mercadeies que supòrte era carretèra N-230/N-155 entre era Val d’Aran e era Communauté de Communes des Pyrénées Haut-Garonnaises, e de coma actuar entà melhorar era circulacion e era seguretat viaria entre Lhèida-Vielha-termièra damb França e dera termièra en deuant, a estat un aute des tèmes tractadi pendent era reünion de trabalh. En aguest sentit era sous-préfète, Marie Paule Demiguel, a explicat qu’es òbres de desviament deth transit de camions de transpòrt pesant en Saint Béat se preve que siguen acabat er an 2024.

Era reünion de trabalh tanben a servit entà abordar aspèctes restacadi damb projectes transfronterièrs compartidi coma eth deth camin de Saint Jacques (Camin de Sant Jaume) e eth camin dera libertat impulsat pera Deputacion de Lhèida.

Fin finau des deth Conselh Generau d’Aran, s’a informat ara sous-préfète, sus era candidatura des Jòcs Olimpics d’Iuèrn Pirenèus-Barcelona 2030.

Pendent era sua visita ara Val d’Aran, Marie Paule Demiguel a agut era oportunitat de visitar eth Musèu dera Val d’Aran, a on a realizat ua visita guidada ara installacion, e a signat ath Libre d’Aunor de visitants deth musèu.