• Eth govèrn d’Aran s’amasse damb representants de Carretères der Estat, Mossos d’Esquadra, Pompièrs-Emergéncies e ajuntaments aranesi entà tractar es mesures a desvolopar pendent era sason d’iuèrn entà facilitar era vialitat e seguretat dera N-230 e era C-28

Eth sindic d’Aran, Francés Boya, e eth conselhèr de Territòri, Paisatge e Gestion ambientau, Francés Bruna, s’amassèren ager damb es principaus agents implicats ena gestion dera vialitat dera carretèra N-230 e era comarcau C-28.

Ena amassada sus era vialitat dera N-230, ena quau sigueren presents eth cap dera Unitat de Carretères der Estat en Lleida, Juan Antonio Romero, eth Major de Pompièrs-Emergéncies, Manel Bosch, er alcalde de Les, Andreu Cortés, eth còsso de Miei Naturau e Paisatge de Vielha e Mijaran, Jacinto Cuny, tecnics deth Centre de Lauegi e Proteccion Civila e Mossos d’Esquadra, eth sindic d’Aran comuniquèc que dejà s’an iniciat es tramits entara limitacion deth pas de camions pendent es dimenjades de deseme a març entà melhorar era seguretat des usatgèrs d’aguesta via es dies de mès afluéncia.

Aguesta mesura plantejada per equip de govèrn deth Conselh e aprovada peth plen deth passat 13 de noveme, supausarie ua melhora ena grèu problematica que represente tara Val d’Aran eth pas des 500 camions diaris que trauèssen es nòsti pòbles. Atau coma afirme eth sindic, “i a uns dies ath long der an, especiaument es dimenjades qu’ei dubèrta era estacion d’esquí, en qu’eth pas des camions per aguesti trams tan complicadi collapse eth trafic e a grèus efèctes ena seguretat des usatgèrs”.

D’un aute costat, ena amassada de vialitat dera C-28, ara quau se higeren er alcalde de Naut Aran, Cesar Ruiz-Canela, e eth director de montanha de Baqueira-Beret, Jordi Cardona, se parlèc de velhar pera floidessa d’aguesta via pendent es dies de mès afluéncia toristica, ei a díder, pendent es dimenjades e hesters dera sason d’esquí.

“Des deth govèrn deth Conselh Generau demanaram era conscienciacion des veïculs de servicis o subministraments entà qu’eviten circular pendent es ores mès critiques d’aguesti dies senhaladi e, s’ei de besonh, ne limitariem era sua circulacion entà assegurar era floidessa deth trànsit ena C-28”, afirme eth sindic d’Aran.