• Era Comission d’Urbanisme d’Aran autorize era ampliacion deth camping Verneda, en municipi de Vielha e Mijaran, e deth camping Espalias de Bossòst

• Lum verda tanben ara substitucion e cambi de traçat des telecagires entà naui esquiadors deth Plan de Beret, entà incrementar era seguretat des usatgèrs

Era Comission d’Urbanisme dera Val d’Aran, presidida pera sindica d’Aran, Maria Vergés e eth secretari d’Agenda Urbana e Territòri, Agustí Serra, a aprovat aué dus plans especiaus entara ordenacion, ampliacion e melhora des campings Verneda e Espalias, atau coma era sustitucion de dus telecagires dera estacion d’esquí Baqueira-Beret.

En cas deth Camping Verneda, plaçat ena poblacion de Pònt d’Arròs, damb 182 unitats d’acampada (23 fixes e 159 mobils) e capacitat entà 546 usatgèrs, eth Plan prepause ampliar era superficie deth camping en 30.640 m² de terren, en continuitat damb era zòna esportiva e d’espacis liures dera installacion, ara esquèrra der arriu a andús costats deth camin reiau.

Açò permeterà dispausar de mès espaci entà redistribuir es unitats fixes e mobils e es edificacions entà tot eth camping, aluenhant-se dera zòna inundable e garantint era seguretat des persones usatgères. Era melhora des installacions tanben darà compiment as requisits d’un camping de dusau categoria.

Atau donc, se passe de 182 unitats d’acampada a 195 (75 fixes e 120 mobils), un totau de 13 addicionaus. Ath delà se cambiarà d’ubicacion 35 unitats d’acampada existents plaçades en zona inundable e, coma conseqüéncia, s’ampliarà era zòna verda parallela ar arriu. Tanben s’ampliaràn es actuaus bastisses de servicis e se’n bastiràn dues de naues. Es espacis liures s’incrementen en 26.240 m². Eth Plan establís que se reiraràn es unitats d’acampada en zòna inundable en un maxim de 5 ans, e qu’eth conjunt des trabalhs contempladi se desvoloparan en un maxim de 10 ans.

Mès bungalows en camping Espalias

En cas deth camping Espalias de Bossòst, qu’a 59 unitats d’acampada e capacitat entà 177 persones, se prepause ampliar-lo en 2.938 m², en continuitat damb eth costat sud, en tot seguir eth traçat dera carretèra N230.

Eth Plan especiau prevé ordenar er emplaçament d’usatges actuaus deth camping entà adequar es installacions ara creishent demana d’unitats fixes. Atau, ena ampliacion en costat dret se prevé era installacion de carpes desmontables e d’ua zòna verda entà usatge esportiu. Se possibilite er increment d’unitats d’acampada enquiàs 78, en tot variar era tipologia. Es unitats fixes passen de 21 a 31, e es mobils s’incrementen de 37 a 47. En totau, era capacitat deth camping creish enquiàs 234 persones.

Autant en cas deth camping Verneda coma en cas d’Espalias, era comission a aprovat definitivament es respectius plans especiaus mès se suspèn era sua entrada en vigor enquia que se presenten es tèxtes que incorporen es prescripcions de caractèr tecnic qu’indique.

Naui telecagires en Baqueira-Beret

D’un aute costat, era Comission a aprovat tanben definitivament eth projècte entà sustituir es actuaus telecagires plaçadi ena zòna de debutants deth Plan de Beret, damb petites modificacions enes traçats. Es telecagires Plan de Beret e Clòt der Os se sustituiran per dues installacions mès modèrnes, comòdes, rapides e segures entàs usatgèrs.