Agèr, deluns dia 30 de noveme, era Comission d’Urbanisme dera Val d’Aran, amassada ena sedença deth Conselh Generau d’Aran, aprovèc era modificacion des Nòrmes subsidiàries de planejament en relacion damb er entorn dera UA-2 Ruda e infrastructura de transpòrt peth hilat de connexion damb es pistes d’esquí, entà adaptar-les ath PDU (Plan Director Urbanistic) dera Val d’Aran.

Eth Govern dera Generalitat de Catalonha, aprovèc eth passat 16 de seteme de 2015 era declaracion d’utilitat publica e d’interès sociau deth telecagira TC Baqueira, en tèrme municipau de Naut Aran. Aguesta importanta installacion connècte eth parcatge dera urbanizacion UA-2 Ruda ena còta 1479, damb era entrada principau dera estacion de Baqueira Beret ena còta 1.500 e tanben ena còta 1.800 damb ua capacitat de 3.000 persones per ora.

Ena practica, eth telecagira permet amendrir era intensitat mieja diaria enes carretères C-124b e C-28 e, dotar damb 4.000 places de parcatge es installacions que permeteràn as usatgèrs non auer d’accedir as parcatges dera còta superiora dera estacion.