• Per prumèr còp ena istòria, un Secretari d’Estat francés visite era Val d’Aran en marc dera estrategia transfronterèra Espanha-França deth Ministèri entara Transicion Ecologica e eth Rèpte Demografic entà tractar ahèrs d’interès en desvolopament dera cooperacion transfronterèra e eth desvolopament rurau

• Pendent era amassada entre es representants territoriaus, era sindica d’Aran tornarà a méter dessús dera taula ahèrs tant importants entath nòste territòri coma era redubertura deth Portilhon o era collaboracion en matèria sanitaria

Era Val d’Aran acuelherà aguesta tarde era amassada entre eth Secretari Generau entath Rèpte Demografic espanhòu, Francés Boya, e eth Secretari d’Estat de Ruralitat de França, Joël Giraud, e ua posterior amassada ena que prenerà part era sindica d’Aran, Maria Vergés, e d’auti representants d’entitats locaus e collectius entara presentacion de projèctes de desvolopament territoriau.

Aguesta visita se correspon ara estrategia transfronterèra França-Espanha impulsada peth Ministèri entara Transicion Ecologica e eth Rèpte Demografic.

“Entara Val d’Aran ei tot un aunor acuélher un eveniment d’aguesta relevancia, especiaument auent en compde era relacion istorica qu’a auut tostemp eth nòste territòri damb eth país vesin” manifestaue era sindica d’Aran, que higie que: “cau destacar era importància qu’a entà Aran compdar damb un representant aranés en govèrn der Estat, coneishedor dera realitat des territòris de montanha e sensible damb es politiques transfronterères e de vesiatge”.

Pendent aguesta jornada se tractaràn ahèrs d’interès entà andús païsi en matèria de cooperacion en diuèri airaus coma sanitat, educacion o economia, e era sindica d’Aran meterà, un còp mès, dessús dera taula era importáncia qu’a era redubertura deth pòrt deth Portilhon entara Val d’Aran.