• Era commemoracion dera Hèsta d’Aran d’enguan coincidís damb eth 30 aniversari dera reinstauracion deth Conselh Generau d’Aran coma maxima institucion dera Val d’Aran

• Pendent er acte institucionau celebrat aué, en qué i a prenut part tanben era conselhèra d’Igualtat e Feminismes dera Generalitat, eth Conselh Generau d’Aran a volut recuperar es Prèmis 17 de Junh e autrejar-lo, de forma solemna e simbolica, ara gent grana d’Aran, en tot èster un des col·lectius mès afectadi pera pandèmia, coma mòstra de reconeishement, arregraïment e estima deth pòble aranés ara sua contribucion ath nòste país

Eth govèrn deth Conselh Generau d’Aran a organizat aué, 17 de junh, era Hèsta d’Aran que commemòre enguan es 30 ans dera restitucion dera maxima institucion aranesa.

Era sindica d’Aran, Maria Vergés, e era conselhèra d’Igualtat e Feminismes dera Generalitat de Catalunya, Tània Verge, an presidit aguesta celebracion, qu’a compdat tanben damb era preséncia deth subdelegat deth Govèrn en Lleida, José Crespín, era directora Generau dera Administracion Locau, Montserrat Fornells, eth Delegat Territoriau deth Govèrn dera Generalitat en Naut Pirenèu e Aran, Ricard Pérez, e eth secretari d’Administracions Locaus e Relacions damb Aran, David Rodríguez.

“Era Val d’Aran celèbre 30 ans d’autogovèrn enes qu’eth Conselh Generau d’Aran a anat assolint naues còtes d’autonomia que mos an permetut contribuïr a atier es besonhs e rèptes deth nòste territòri e dera sua gent” afirmaue era sindica d’Aran, en tot híger que: “totun, encara auem un long camin per recórrer en aguest sens e eth desplegament efectiu dera Lei d’Aran ei clau entà arténher un assolidament e melhora importants deth nòste autogovèrn”.

Pendent er acte institucionau s’a amiat a tèrme era entrega deth Prèmi 17 de Junh ara gent grana d’Aran, coma reconeishement a un des collectius mès afectat pera pandemia, en representacion deth quau i an participat membres des Casaus de Jubiladi de Vielha e Bossòst e residents dera Residéncia Sant Antòni.

“Eth virus les a afectat especiaument, autant per çò que hè ara sua salut coma ath sòn benèster emocionau e, malerosament, fòrça d’eri non an podut a vencer-lo”, manifestaue era sindica d’Aran, que higie que “era istòria d’Aran non se pòt explicar sense era istòria des que mos an precedit, de totes aqueres persones qu’an lheuat aguest petit gran país nòste, qu’an estat, e son, exemple de fortalesa e entrèga tà totes es generacions qu’an vengut dempús”. Per aguest motiu, “eth Conselh Generau d’Aran a volut recuperar enguan, de forma especiau, es Prèmis 17 de Junh, e autrejar aguest guerdon ara gent grana d’Aran, coma mòstra de reconeishement, arregraïment e afècte deth nòste país a totes aqueres persones que representen es nòstes arraïcs e es valors dera generositat, er esfòrç e era dignitat”.

Eth govèrn d’Aran a volut realizar tanben un aumenatge as victimes dera COVID-19 en territòri, e s’a sauvat ua menuta de silenci ena sua memòria.

Ath delà der acte institucionau, eth govèrn deth Conselh Generau d’Aran a premanit tanben un seguit d’activitats culturaus e de léser dirigides a toti es publics e de franc. S’a inaugurat era exposición Conselh Generau d’Aran, 30 ans d’autogovèrn ena Glèisa de Mijaran.

Deth 14 ath 16 de junh s’an aufrit visites guidades tara Casa deth Senhor d’Arròs, deth 15 ath 20 de junh i aurà entrada liure ath Musèu dera Val d’Aran e ar Ecomusèu Çò de Joanchiquet, en orari de maitin e de tarde.

Fin finau, aguesta tarde entàs 17:00 ores, aurà lòc era representacion der espectacle entà tota era familha “Karoli, l’home roda”. Segontes era meteorologia, s’amiarà a tèrme ena Plaça d’Aran o ena Sala Polivalenta de Vielha.