• Eth Santuari de Mijaran a acuelhut un an mès er acte institucionau entara commemoracion dera Hèsta d’Aran a on eth govèrn aranés, cèrque era implicacion des aranesi e araneses entà veir ena institucion eth punt de referéncia tà milhorar era sua qualitat de vida de present e futur.

• En acte s’a hèt eth liurament deth Prèmi 17 de Junh d’enguan ara Associacion de Donants de Sang dera Val d’Aran en reconeishement pera sua labor desinteressada tà fomentar era participacion dera societat en un acte tan generós com ei sauvar vides o milhorar er estat de salut de fòrça persones, un collectiu que hè 20 ans que trebalhe en aguest camp.

Eth Conselh Generau d’Aran a tornat a celebrar eth 17 de Junh era Hèsta d’Aran, en uns actes que commemòren er aniversari dera restitucion dera maxima institucion aranesa e era recuperacion deth autogovèrn en 1991.

Era sindica d’Aran, Maria Vergés, a presidit era celebracion acompanhada deth president deth Parlament de Catalonha, Josep Rull, e dera vicepresidenta deth Govèrn e conselhèra dera Presidéncia, Laura Vilagrà, eth deputat deth Congrès des Deputats espanhòu, Amador Marqués, eth secretari generau entath Rèpte Demografic, Paco Boya, eth president deth grop parlamentari PSC-UNITS, Salvador Illa, atau coma es conselhères e conselhèrs deth Conselh Generau, alcaldes e d’autes autoritats.

En sòn parlament era sindica d’Aran, Maria Vergés a restacat: “Des deth govèrn d’Aran trabalham entà arténher, per un costat, ua reforma dera Lei de Regim Especiau dera Val d’Aran que mos a de perméter resòler qüestions que restringissen aguesta capacitat de decision e gestion, e ath madeish temps, ua reforma que garantísque eth compliment des acòrds e de traspassi competenciaus. Ua modificacion tara que demoram compdar damb era complicitat e empatia de besonh per part deth pròpri Parlament de Catalonha e des sòns grops politics”. Era Sindica a hijut: “tà arténher aguesta consolidacion  ei de besonh compdar damb tres elements clau, un corrècte desplegament competenciau, un sistèma de finançament just e leiautat e respècte entre es institucions. Sense aguesti tres principis, desvolopar ua autonomia politica ei practicament impossible. Era Val d’Aran coma era rèsta deth territòri deth Pirenèu, a per endauant rèptes de granes dimensions que coma govèrn ja auem començat a afrontar”.

En motiu d’aguesta celebracion eth Conselh Generau d’Aran a elaborat un video commemoratiu  e divulgatiu sus era istòria d’Aran que se pòt veir enes hilats dera institucion.

Pendent er acte institucionau s’a hèt eth liurament deth Prèmi 17 de Junh, qu’enguan eth Plen deth Conselh Generau a decidit autrejar, per unanimitat, ara Associacion de Donants de Sang dera Val d’Aran pera sua aportacion en un acte generós de sauvar vides e milhorar era salut e benèster des persones que n’an de besonh.

Ath long d’aguesti dies e laguens der hestau dera Cultura “TerSon eth son dera tèrra” s’an amiat a tèrme diferentes activitats culturaus, musicaus e ludiques tà hèr en familha un prumèr hestau programat peth govèrn aranés laguens der encastre dera Hèsta d’Aran tà apropar-la ara societat aranesa.

Vielha, 17 de junh 2024