• Pendent er acte institucionau celebrat aguest meddia en Santuari de Mijaran, era sindica d’Aran a manifestat era intencion deth govèrn d’Aran de trabalhar entà qu’es aranesi e araneses veiguen en Conselh Generau d’Aran ath govèrn de toti, entà que se senten orgulhosi e orgulhoses d’ua institucion qu’ei indispensabla entà melhorar era sua qualitat de vida e entà deféner eth sòn present e futur

• En aguest acte, s’a hèt entèga deth Prèmi 17 de Junh as cinc còlhes de dances tradicionaus araneses peth sòn intens trabalh de recuperacion e transmission deth patrimòni immateriau deth país, qu’a auut coma èish vertebrador era difosion dera lengua pròpria d’Aran a trauès dera musica, e tanben pera sua importanta labor sociau, de coesion e interrelacion

Eth Conselh Generau d’Aran a tornat a celebrar coma cada 17 de junh era Hèsta d’Aran, que commemòre er aniversari dera restitucion dera maxima institucion aranesa en 1991 e era recuperacion deth nòste autogovèrn.

Era sindica d’Aran, Maria Vergés, a presidit aguesta celebracion, qu’a compdat tanben damb era preséncia deth secretari generau entath Rèpte Demografic, Paco Boya, eth delegat deth govèrn en  Naut Pirenèu e Aran, Josep Castells, alcaldes e d’autes autoritats.

Pendent era sua intervencion, Vergés a afirmat que “deth govèrn d’Aran ençà volem trabalhar entà qu’es aranesi e araneses veiguen en Conselh Generau d’Aran ath sòn govèrn, ath de toti, entà que se senten orgulhosi e orgulhoses d’ua institucion qu’ei indispensabla entà melhorar era sua qualitat de vida e entà deféner eth sòn present e futur. Volem renauir eth ligam emocionau damb era tèrra e damb eth país, adaptar-lo as naui tempsi e, bastir un Aran de toti e tà toti, entà hèr d’aguest petit gran país, eth país de toti e totes”.

En acte institucionau s’a presentat eth video commemoratiu d’enguan, que se pòt trapar en toti es hilats sociaus deth Conselh Generau d’Aran, e qu’a ua foncion divulgativa sus era istòria dera maxima institucion aranesa. En aguest sens, er sindica d’Aran a afirmat que: “era Val d’Aran a mantengut intacta pendent sègles era sua ‘volontat d’èster’, ua volontat qu’eth govèrn d’Aran manten fèrma e constanta e qu’a coma basa eth convenciment de que sonque a trauès dera defensa des drets e oportunitats d’Aran e des aranesi e araneses seram capables d’auançar coma pòble e de hè’c de manèra solidària, generosa e leiau damb era rèsta de pòbles e territòris”.

Pendent er acte institucionau, s’a amiat a tèrme eth liurament deth Prèmi 17 de Junh, qu’enguan eth Plen deth Conselh Generau d’Aran a decidit autrejar, per unanimitat, as cinc còlhes de dances tradicionaus: era Còlha de Santa Maria de Mijaran, es Corbilhuèrs de Les, es Fradins de Vielha, es Gripets de Naut Aran e es Sautarèths de Bossòst.

“Eth papèr des grups de dança d’Aran a estat clau entara conservacion dera cultura d’arraïc, d’aquera que mos rebrembe d’on venguem e que tanben mos ajude a saber entà on volem anar. Mès non sonque aquerò, se non que tanben representen un esturment essenciau entà impulsar era coesion e integracion sociau, e, sustot, entara transmission de valors as naues generacions”, manifestaue era sindica d’Aran, que higie que: “volem qu’aguest prèmi servisque tà rebrembar qu’era tradicion non ei era adoracion des cendres, se non era transmission deth huec. D’aqueth huec que mos cahue e reconfòrte e que, tanben, mos ilumine quan se hè de net”.