• En conéisher era noticia de qu’era Generalitat permeterà era mobilitat entre er Alt Urgell e Andòrra a compdar d’aguesta dimenjada, e dempús d’auer reclamat en diuèrses cartes adreçades ath govèrn catalan era armonizacion des restriccions entre Aran e França, era sindica d’Aran a denonciat aué acompanhada des alcaldes e alcaldesses aranesi e es conselhèrs e conselhères deth Plen eth tracte desiguau e era indiferéncia dera Generalitat envers ara realitat e eth govèrn dera Val d’Aran

Dempús des declaracions dera portavotz deth Govèrn dera Generalitat, Meritxell Budó, anonciant ager qu’a compdar d’aguesta dimenjada se permeterà qu’era comarca der Alt Urgell englòbe Andorra entà restablir atau era mobilitat entre andús territòris, era sindica d’Aran, Maria Vergés, a denonciat aué, acompanhada pes alcaldes e alcaldesses d’Aran e es conselhèrs e conselhères deth Plen, eth tracte desigual e injust qu’açò supause entara Val d’Aran e era termièra damb França.

“Des deth govèrn deth Conselh Generau d’Aran auem amiat a tèrme pendent setmanes totes es gestions e contactes possibles en tot demanar ath govèrn catalan era armonizacion des mesures entre Aran e França dera madeisha forma qu’ac demanèc er Alt Urgell damb Andòrra”, afirmaue era sindica d’Aran, “er anonci dera Generalitat ager supause un grèuge comparatiu entath nòste territòri e eth govèrn deth Conselh Generau d’Aran, coma maxima institucion aranesa non pòt acceptar tractes desiguaus e injusti coma aguest”.

Era sindica d’Aran a manifestat que: “èm totaument conscients dera situacion provocada pera COVID-19 e deth besonh d’aplicar es mesures e restriccions entà controlar eth virus, totun tanben consideram qu’ei de besonh que toti es territòris pogam compdar damb es madeishes oportunitats entà qu’era nòsta ciutadania hèsque front ad aguesta crisi damb es maximes garanties, sustot tanben en tot tier en compde qu’actuaument es donades dera Val d’Aran la placen coma un des territòris damb mens risc de rebròt de Catalunya”

Atau madeish, Vergés a remercat era importància qu’a era frontèra tà ua part importanta dera Val d’Aran, especiaument eth Baish Aran, pr’amor que “compartís non sonque un espaci comun d’escambi de relacions economiques e laboraus, senon tanben de relacions sanitàries e educatives”.