•    Entà guanhar eficiéncia ena programacion en atencion primària e comunitària se vò fomentar era airina digitau: Programacion per motius
•    Eth Conselh Generau, a trauès des Servicis Assistenciaus Integradi d’Aran, desvoloparà aguesta pròva pilòt, impulsada peth Departament de Salut dera Generalitat, entara implementacion deth nau modèl de gestion dera demana

Aguest nau modèl aten ara importància d’aufrir canaus agils d’accès ara atencion primària e comunitària en çò que tanh ara demana de consultes e cites, pr’amor qu’actuauments era manèra d’atier ara demana ei a trauès de canaus d’atencion diuèrsi e diferenti perfils professionaus implicadi. Damb aguesta naua airina, en unificar-se era programacion se redusirà eth temps de responsa e se dirigirà as usatgèrs/es ath recors mès avient as sòns besonhs.

Era programacion per motius ei ua naua airina digitau entà demanar ora ena atencion primària e comunitària que milhore eth sistèma de programacion pr’amor qu’adapte a cada besonh des pacients eth temps, eth professionau e eth tipe d’atencion.

Entà accedir ad aguest servici i a diferentes manères, ua, a trauès dera web https://citasalut.gencat.cat en tot identificar-se damb eth numèro CIP dera tarjeta sanitària. Dempús arreceberàs un SMS en telefon damb un còdi qu’auràs d’introdusir. O era auta, damb era app de La Meva Salut en tot clicar en Cita Prèvia se redirigirà tara web de Programacion per Motius. En andús casi, calerà escuélher un des motius que i a en foncion der estat deth pacient, e er algoritme informatic determinarà quina ei era cita, consulta o gestion damb eth professionau e eth tipe de visita mès apropiat. En cas de non trapar eth motiu de besonh, se pòt mercar era opcion de sollicitar cita presenciau o telefonica damb es professionaus de salut de referéncia.

Era peticion d’ora per telefon o dirèctament en taulèr d’atencion der Espitau Val d’Aran contunharà vigenta mès es professionaus qu’atien tanben programaràn es visites damb aguesta madeisha web e haràn es preguntes apropiades entà obtier era forma d’atencion que milhor correspongue as besonhs des usatgèrs/es.

Era sindica d’Aran, Maria Vergés, manifestaue ath torn d’aguest ahèr que: “Damb aguest nau modèl volem redusir fòrça procèssi en tot reordenar e optimizar es recorsi disponibles e melhorar e facilitar er accès dera ciutadania ath sistèma sanitari e sociau en menor temps possible, en tot priorizar es nivèus d’urgéncia”.