Vielha, 17 d’agost de 2018.- Eth Conselh Generau d’Aran, amassa damb er Avescat d’Urgelh, eth Musèu dera Val d’Aran, era Escòla Superiora d’Arquitectura dera Universitat Rovira i Virgili e era Escòla Superiora d’Arquitectura dera Universitat Internacionau de Catalonha, premanís entath pròplèu iuèrn ua exposicion sus er auviatge Sacre Aranés damb eth títol ARAN + ME FECIT, ena quau per prumèr còp s’exposarà era planimetria, fotografies e documentacion sus 42 glèises e capèles araneses.

Amassa damb es trabalhs dera exposicion, parallelament se trabalhe ena confeccion d’un libre en qué se mostrarà er estat actuau de tot aguest auviatge damb articles de referéncia sus cadun des aspèctes deth madeish.

Entad açò s’a constituït un comitat editoriau integrat per Jèp de Montoya, assessor de Cultura deth Conselh Generau d’Aran, Elisa Ros Barbosa, responsable der Airau d’Auviatge Culturau deth Conselh Generau d’Aran, Mn. Josep Mª Mauri Prior, vicari generau der Avescat d’Urgelh, Josep Lluís Ginovart, catedratic dera Escòla Superiora d’Arquitectura dera Universitat Internacionau de Catalonha e Agustí Costa, professor dera Escòla Superiora d’Arquitectura dera Universitat Rovira i Virgili. Aguest comitat ei er encargat de convidar a collaborar en projècti as diferenti especialistes e tanben s’aucupe de survelhar es contenguts, maquetacion e dessenh dera publicacion.

Eth libre serà publicat en lengua aranesa, mès damb era volontat de hèr arribar es sòns contenguts a especialistes e persones interessades en auviatge dera Val d’Aran, ath delà der encastre territoriau pròpri. Eth Conselh Generau d’Aran a encargat revirar des articles tanben ath catalan, castelhan, francés e anglés.

Era edicion deth libre compdarà damb es tèxtes introductoris der arquevesque d’Urgelh e copríncep d’Andòrra, Monsenhor Joan Enric Vives Sicília e deth sindic d’Aran, Carlos Barrera.

Ath delà des articles des membres deth comitat editoriau, era edicion compdarà damb es aportacions de destacadi especialistes mondiaus coma Serge Brunet, dera Universitat de Montpelhièr; Manuel Castiñeiras, dera Universitat Autonòma de Barcelona; e Howard Bradley, dera Universitat de Cambridge, entre d’auti.

Eth libre includirà un mapa damb planimetria e fotografies damb detalhs des glèises dera Val d’Aran.