• Era sindica d’Aran a iniciat aguesta setmana era ronda de contactes damb es grups politics deth Congrès entà trasladar-les eth besonh qu’er Estat reconeishe de forma efectiva era singularitat e autogovèrn aranés en tot impulsar era reforma normativa de besonh tà qu’eth Conselh Generau d’Aran dèishe d’èster considerat juridica e administrativaments coma ua administracion locau.

• Era maxima institucion aranesa a reconeishuda era sua autonomia politica autant en Estatut d’Autonomia de Catalunya coma ena Lei de Regim Especiau d’Aran e, tot e gestionar competéncies de tipe autonomic coma era sanitat, demore tractat ena practica coma ua administracion locau, çò que met en risc es servicis publics e era atencion propèra e de qualitat as besonhs dera ciutadania aranesa.

Era sindica d’Aran, Maria Vergés, a amiat a tèrme diuèrses amassades en Madrid damb grups politics deth Congrès des Deputats, damb eth doble objectiu de, per un costat, hèr a conéisher era realitat politica d’Aran e, per aute, eth de trasladar eth besonh urgent de qu’er Estat reconeishe de manèra efectiva era singularitat aranesa e era sua autonomia politica. Ath long d’aguesta setmana, era sindica d’Aran s’a amassat damb es grups deth PNV, ERC, PSOE, Coalición Canaria e PP, en tot preveir es trobades damb era rèsta de grups pendent es pròplèu dies.

Aguestes amassades an servit entà trasladar as grups parlamentaris era actuau situacion dera maxima institucion d’Aran que, tot e compdar damb un naut reconeishement institucionau e politic en Catalunya, a de besonh qu’era sua singularitat se veigue tanben reconeishuda de manèra efectiva a nivèu juridic e administratiu laguens der Estat. En aguest sens, era sindica d’Aran a manifestat que, “era Val d’Aran ei ja er unic territòri der Estat que non a aguest reconeishement dera sua singularitat, quauquarren qu’actuauments, met en risc era pròpria atencion as besonhs dera nòsta societat”, en tot híger que “ath delà de que se contraditz aquerò que mandate er Estatut d’Autonomia e era Lei d’Aran respècte deth nòste autogovèrn, mos trobam deuant deth risc de collapse qu’impedisque era corrècta gestion des servicis publics en Aran”.

Vielha, 25 de gèr 2025