• Aguest nau servici d’SMS interactiu permeterà as usatgèrs e usatgères confirmar, anullar o reprogramar es sues cites mediques, athdelà d’obtier informacion sus era preparacion d’ua pròba o era consulta tà a on an d’anar.

A compdar d’aué ei dejà en foncionament un nau modèl de gestion de cites mediques a trauès d’un SMS interactiu desplegat per Aran Salut. Un estrument orientat tant a agilizar es procèssi de gestion des cites com a afavorir era comoditat des usatgèrs e usatgères d’Aran entà interactuar damb eth sòn espitau, mejançant un aplicatiu que poiràn manipular des deth sòn dispositiu mòvil.

Es diferents SMS enviada serviràn com un rebrembe des pròplèus cites e vieràn acompanhades d’un ligam que, ath clicar dessús, mos portarà a ua pantalha a on se mostraràn es visites pendentes. Era aplicacion mos informarà des dies e oraris de visita, atau com era consulta a on auem d’anar. En cas que no mos vengue ben era cita programa, la poderam anullar o cambiar sense problèmes en madeish aplicatiu. Eth nau sistèma sonque ei disponible en airau d’espitalizacion, relatiu a totes aqueres cites e assisténcia prestada peth personau medic especializat.

Aguesta ei ua iniciativa promoiguda peth departament de Salut dera Generalitat de Catalunya qu’er airau de Benèster e Salut deth Conselh Generau d’Aran, Aran Salut, e eth Espitau Val d’Aran an volgut implementar entà enriquir es recorsi assistenciaus que s’aufrissen en sistèma d’atencion sanitària en territòri.

En aguesta linha, des d’Aran Salut actuaument trebalhen en un nau sistèma d’atencion telefonica as usatgèrs e usatgères que facilitarà era comunicacion damb aqueres persones que un còp agen trucat ath espitau e non agen podut èster atengudes per estar toti es operadors e operadores ocupades, auran era opcion de demanar que se les contacte posteriorament.

Vielha, 1 d’agost  de 2022