Eth càncer colorectal ei eth càncer mès frequent ena poblacion se se considèren es dus sèxes.

Ei eth dusau tumor mès frequent en es hemnes, dempús deth de mama, e eth tresau en es òmes, dempús deth de pròstata e paumon.

Era sua frequéncia aumente damb era edat e era majoria des casi se sòlen dar per dessús des 50 ans.

Era deteccion precoç deth càncer colorectal a per objectiu detectar eth càncer en etapes fòrça precoces, quan es persones non an simptòmes, çò que permet qu’es tractaments siguen mès efectius.

En d’auti casi, era deteccion precoç pòt detectar pòlips, es quaus son alteracions benignes der interior deth budèth, mès qu’en cors deth temps, bèri uns apoiridien tornar-se malignes. Era sua deteccion e extirpacion evite aguesta possibla progression.

Eth programa de cribratge o deteccion precoç deth càncer colorectal ei dirigit as òmes e as hemnes damb edat entre 50 e 69 ans, periòde d’edat de mès risc e ena qu’era deteccion precoç s’a demostrat beneficiosa.

Era pròva de cribratge consistís en hèr un tèst de deteccion de sang amagada ena femta entà trobar-i quantitats tan petites de sang que non se pòden veir a simpla vista. Aguesta pròva se hè en casa e un còp retornat, s’analise en laboratòri.

Es càncers e es pòlips pòden sagnar de tant eth tant, per açò era preséncia de sang pòt èster indicatiua dera possibla preséncia d’aguestes lesions.

Cau tier en compde, mès, qu’era preséncia de sang amagada ena femta non signifique que tostemp sigue a causa d’un càncer. Pòt èster a causa d’ua alteracion benigna (per exemple un pòlip benigne o emorroides). Ei per açò qu’eth programa quan detecte aguesta sang se n’a d’estudiar era causa mejançant ua colonoscòpia.

Beneficis

Es estudis realizadi indiquen qu’era deteccion precoç deth càncer colorectal mejançant aguesta pròva aumente es possibilitats de curacion e pòt amendrir era mortalitat per aguest tumor enquiath 16% en es participants en programa.

En es casi en que se detecten pòlips, se pòden extrèir facilaments, en tot redusir-ne eth risc de desvolopar càncer.

Limitacions

En bèri uns casi, encara qu’era pròva de deteccion precoç detecte sang ena femta, era colonoscòpia diagnostica determine qu’era causa des indicis de sang ena femta ei ua alteracion benigna e non un càncer.

Era pròva de deteccion de sang amagada ena femta, coma quinsevolh pròva medicau que sigue, non ei perfècta e non detecte toti es càncers. Pòt èster que non se detecte eth càncer o eth pòlip s’en eth moment de hèr era pròva non sagnaue. Per aguest motiu, se notatz bèra molèstia (sang enes deposicions, cambis en es abituds intestinals pendent mès de sies setmanes, dolor abdominal) consultatz eth vòste mètge encara que participatz en programa.

Invitacion

Totes es hemnes e òmes de 50 a 69 ans dera Val d’Aran arreceberàn ua carta d’invitacion e les trucaràn entà participar.

En aguesta carta s’indique qué cau hèr entà arrecuélher, a completar e retornar era pròva de deteccion de sang amagada ena femta.

Entà quinsevolh aclariment se pòt trucar ath telefòn 973 64 31 50, de deluns a diuendres, de 09h00 a 15h00, o per mail: prevencioccr@aransalut.com.

Eth programa de prevencion de càncer de colon e rècte compde damb era collaboracion deth Servici Aranés de Benéster e Salut, eth Conselh Generau d’Aran, era Deputacion de Lleida e eth Col.legi de Farmacèutics de Lleida.