• Eth govèrn deth Conselh Generau d’Aran s’a aderit ath document de bases Quina economia entàs petiti pòbles?, prebotjat pera Societat d’Estudis Bascs e eth Comissionat entath rèpte demografic deth Govèrn d’Astúries, que preten èster era pèira angular d’un projècte de país que vò auer molt en compde eth patrimòni e aportacion d’aguesti petiti pòbles ath conjunt dera montanha

Eth govèrn deth Conselh Generau d’Aran s’a aderit ath document de bases, prebotjat pera Societat d’Estudis Bascs e eth Comissionat entath rèpte demografic deth Govèrn d’Astúries, entà collaborar ena recerca de solucions ath problèma dera despoblacion e er abandon rurau. Aguesta adesion siguec aprovada aguesta setmana per unanimitat en Plen deth Conselh Generau.

Eth sindic d’Aran, Francés Boya, afirme qu’aguest document, qu’a coma títol Quina economia entàs petiti pòbles?, ei “fòrça important pr’amor que mos a de hèr a plantejar de quina manèra podem reactivar es activitats economiques des petiti pòbles, mès concretament es de montanha, que coma dejà sabem son lòcs a on era poblacion envielhís e i demore cada còp mens gent joena”, e hig que: “aguest document preten èster era pèira angular d’un projècte de país que vò auer molt en compde eth patrimòni e aportacion d’aguesti petiti pòbles ath conjunt dera nòsta Val e ath conjunt dera montanha”.

Es bases de Quina economia entàs petiti pòbles? apunten qu’era devarada socioeconomica e demografica des petiti pòbles aurie d’abordar-se a compdar de modèls economics, culturaus e sociaus de desvolopament locau que, a mès de mobilizar es recorsi pròpis e promòir naues activitats, apòsten per implicar-se ena luta contra eth cambi climatic e a favor dera transicion ecologica e per superar es disfoncions provocades pera industrializacion e era concentracion urbana.

Totun, de forma complementària ara economia agroecologica istorica, es bases d’aguest document afirmen qu’es pòbles pòden e an d’acuélher naues activitats empresariaus e economiques non restacades necessariaments damb era tradicion e es recorsi locaus. Ath viatge, tanben se contèmple qu’era arribada de naui poblants contribuirà a un procés d’autodinamizacion e generacion de naues empreses en encastre des servicis.