Vielha, 19de junhsèga de 2018.- Aguest dissabte 21 de junhsèga se celèbre era 4au edicion d’Era Roda Non Stop, ua pròva ciclista que neishec entà dar cabuda a toti es amants deth mountain bike pur, en un entorn privilegiat com ei era Val d’Aran e damb ua duretat considerabla.

Enguan coma ena edicion der an passat se prepausen dues distàncies:

Ultramarathon: Damb 140km e un desnivèu positiu de 5200m, aguesta pròva se place entre ua des mès dures deth Pirenèu e circule integralaments pera Val d’Aran, un scenari perfècte entà poder gaudir dera montanha mès autentica.

Marathon: Damb 77km e un desnivèu positiu de 2800m se convertís en complement perfècte entad aqueri que preferisquen ua carrèra mès compacta, mès sense pèrder er encant de circular per aguesti paratges e damb era duretat qu’estampe un desnivèu de 2800m en ua distància de 77km.

Era Roda Non Stop 2018 siguec presentada era setmana passada ena sedença deth Conselh Generau d’Aran peth vicesindic e conselhèr d’Espòrts d’Aran, Luís Carlos Medina, que felicitèc as organizadors peth hèt d’arténher era 4au edicion e animèc des deth Conselh Generau d’Aran a participar en ua des pròves mès atractiues des que se disputen en Aran.

Es organizadors pera sua part expliquèren qu’enguan Era Roda Non Stop compdarà damb quasi 200 participaires qu’en tot gésser de Salardú, cap-lòc deth Naut Aran, circularàn per toti es Terçons dera Val d’Aran, en tot poder gaudir ath long deth recorregut dera vegetacion de nauta montanha e tanben de bòsqui caducifolis enes parts mès baishes.

Es organizadors dera pròva tanben recomanen era utilizacion de GPS en cas de non conéisher eth territòri.