• A compdar d’aué, 8 d’agost, pera tarde e enquiath dia 11 en orari de 11 a 14 ores e de 17 a 21 ores

• Es visitants poiràn gaudir, ath delà des estands damb productes artesanaus, de diferents demostracions aufrides pes pròpis artesans

Eth Passeig dera Libertat de Vielha tornarà a acuélher, un an mès, era hèira d’artesania dera Val d’Aran “Hèt a man, hèt aciu”, que se celebrarà pendent es dies 8 e 11 d’agost.

Aguesta hèira, ena que participen ath torn de 17 artesans de productes agroalimentaris e manufacturats, serà dubèrta ath public a compdar d’aué pera tarde e er orari de diuendres, dissabte e dimenge serà de 11 a 14 ores e de 17 a 21 ores.

Es visitants que s’i apròpen poderàn passar-se pes estands entà crompar es diferenti productes e, ath delà, grani e petiti poderàn gaudir demostracions que s’aufrissen e que començaràn tàs 12 ores.

Diuendres i aurà demostracion d’esmalts ath huec damb Marta García de Pajarito Numnum, dissabte elaboracion de sabon damb Gemma Arjó de Sabon Careça e dimenge ceramica damb Carme Vicens de Carme Vicens-Ceràmica.

Un bon plan entà passar era dimenjada!